Japan : Thi tura hremna pekin kum 60 dawn hnuah thiam chang

Japan court chuan kum 1966-a tualthah thubuaia thiam loh chantir vanga thi tura hremna pek, Iwao Hakamada chu kum 60 dawn hnuah a thubuaiah hian thiam a chantir.

Professional boxer hlui, Iwao Hakamada hi kum 88 mi ni tawhin a hriselna ṭhat tawk loh vangin court-ah hian a inlan thei lo a, a aiah a farnu, kum 91 mi Hideko Hakamada a inlan.

Iwao Hakamada hi kum 1966-a a-boss te nupa leh fate pahnih thata puhin thiam loh chantir a ni. A boss te chhungkua hi an inah vih hlum niin an in hi hal a ni zui bawk. Hetih lai hian Hakama hi soybean processing plant-ah a thawk a, police-ten thu an zawhfiahnaah a tih niin a chhal a, mahse a hnuah a inpuanna hi sut lehin, hetianga sawi tura nawr luih a nih thu a sawi leh a, mahse hei hi an pawmsak lo.

Tualthahna thlenna hmuna DNA evidence an hmuh chu Hakamada DNA nen an inmil lo nia sawi a nih hnuah kum 2014 khan chhuah lailawk a ni a, nikum khan Tokyo High Court chuan a thubuai ngaihtuah ṭhat leh hi a phalsak a, nimin khan Shizuoka District Court chuan tualthah thubuaiah hian thiam a chantir ta a ni.