Gerrard aia ṭha ka la khelhpui lo - Torres
Atletico Madrid striker Fernando Torres chuan Liverpool captain Steven Gerrard chu team khata a khelhpui tawh zawng zawnga player ṭha ber a nih thu a sawi.
Spain international hian kum 2007-2011 chhung khan Liverpool tan a lo khel tawh ṭhin a, Steven Gerrard nena an inkawp kha Premier League player hmuhnawm ber pawl an ni ṭhin.
Khawvela players ṭha ber ber Xavi, Andres Iniesta, Xabi Alonso leh Frank Lampard te kianga lo khel tawh ṭhin Torres hian Gerrard hi a dah sang khawp mai a, "Player ropui tak tak ka lo inkhelhpui tawh ṭhin zawng zawngah Gerrard aia ṭha hi kei chuan ka hre lo a ni," a ti.
Liverpool tan match 142 a khelha goal 81 khungtu Torres chuan, "Gerrard hi ka tan chuan ṭhian ṭha tak a ni a, captain a nihna angin a nau te ho pui turin engtiklai pawn a inpeih reng ṭhin. A thinlunga Liverpool in hmun a chan ngheh zia hi ka hria a, Reds tana a season tawp berah hian trophy chawi ngei se ka tih tehlul nen a chawi dawn ta lo a ni," tiin a player ngaihsanin trophy chawi lo a Liverpool tana a season hnuhnung ber a hmang mai tur chu a ui pui thu a sawi.
Spanish striker chuan season thara MLS lam pan tur Gerrard chu chhanin, "Kum 34-a upa ni tawh mah se inkhel reng turin amahah hian theihna a la awm a ni. Kum upat tawh lamah hi chuan kan che te hi muang deuh tawh ṭhin a, thiamna erawh a danglam tak tak thei lo. USA a an game khelh dan hi England aia a muan deuh zawk avangin Stevie hi MLS-ah hian a hlawhtlin ka ring," a ti.