Europa League Preview Zaninah semifinal lut tur a chiang dawn
UEFA Champions League quarterfinal-ah English club an tel pha lo a, Europa League-ah pawh an tel pha chuang lo. Zanin dar 12:35 hian Europa League quarterfinal second leg khelh a ni dawn.
Semifinal-ah Napoli?
Champions League lamah German champion Bayern Munich-in Portuguese club FC Porto lakah comeback ropui an lantir a, Bundesliga-a an hnuai chiaha awm Wolfsburg-in Italian club Napoli lakah Bayern chet dan entawn an tum ang.
Wolfsburg hian first leg-a Napoli 1-4 ngawta an hneh loh hnuah Pathianni zan khan Schalke nen 1-1 in an inhnehtawk. German club hian semifinal lut turin Italy-ah goal li tal an khung a ngai a, ke vung vangin midfielder Kevin De Bruyne dinhmun a chiang lo.
Rafa Benitez-a pawlte erawh Wolfsburg mikhual turin an inpeih tawh hle. Pathianni khan Serie A-ah Cagliari 3-0 in an hneh.
Spanish manager hian Valencia (2004) leh Chelsea (2013) te chu UEFA Cup/Europa League-ah a champion pui tawh a, Italian manager Giovanni Trapattoni zawha champion nomawi ṭum thum chawi thei dinhmunah a ding.
Sevilla hi...
Champion lai Sevilla-in an mualah Tottenham Hotspur manager hlui Andre Villas-Boas enkawl Zenit St Petersburg 2-1 in an hneh a, amaherawhchu semifinal lut turin Russia-ah an inkhelh leh phawt a ṭul a, a awlsam lo ang.
Sevilla hian nikum khan Benfica hnehin UEFA Cup/Europa League-ah a vawi thum nan an champion a, Unai Emery-a team-te hi La Liga table-ah panganaah an awm mek. Spanish club hian Russian club ṭum li an hmachhawn tawhah vawi thum an chak a, quarterfinal an thlen apiangin an champion bawk. Kartawp inkhelah Barcelona lakah goal hnih phur hmasa mah se 2-2 in an draw thei a, Zenit hmaa buai tur an ni lo.
Zenit hian player langsar lak luh nana pawisa an hman tam avangin tun hnaiah record ṭha tak tak an nei a, kum 1984 hnuah kum 2007, 2010 leh 2012 khan Russian League-ah an champion. Sevilla ang thoin kum 2008 khan Europa League-ah an champion tawh.
Zenit hian Round of 16-ah Torino chu Italy-ah 1-0 in an hneh lo a, mah se an mualah 2-0 a hnehin quarterfinal an lut. Coach Villas-Boas hian kum 2011 khan FC Porto a champion pui tawh a, Sevilla lakah tlawm mai a tum lo ang.
Inkhel dang
Russia-ah Dynamo Kiev leh Fiorentina te 1-1 in an inhnehtawk a, Italy-ah Fiorentina-in goal an chhuah loh chuan away goal rule hmangin semifinal an lut thei ang.
Belgium-ah Club Brugge leh Dnipro Dnipropetrovsk te'n goal an khung lo a, zanina hian Ukraine-ah an inkhel leh dawn a, dinhmun ṭha zawk an awm lo.
Zanin Inkhel Tur
Quarterfinal - Second Leg
Zenit 12:35 AM Sevilla
Dnipro Dniprop 12:35 AM Club Brugge
Fiorentina 12:35 AM Dynamo Kyiv
Napoli 12:35 AM Wolfsburg
Quarterfinal - First Leg
Sevilla 2 - 1 Zenit
Club Brugge 0 - 0 Dnipro Dniprop
Dynamo Kiev 1 - 1 Fiorentina
Wolfsburg 1 - 4 Napoli