Champions League Review Porto dan zawh loh German ral lian

Bayern Munich-in an khelmual Allianz Arena-ah minute 45 chhungin goal nga an khung a, an mikhual Porto chu 6-1 a hnehin Champions League semifinal an lut.

Thawhlehni zan inkhelah Bayern an chungnung takzet a, first leg-ah 3-1 zetin Portugal club lakah tlawm mah se inkhel pahnih belhkhawmah 7-4 in an chak.

Bayern tana goal khat khungtu kum 25-a upa Thomas Muller hian Champions League-ah goal 27 a khung tawh a, German player zingah ani aia goal khung tam an awm lo.

Bayern manager Pep Guardiola hian kum ruk manager a nih chhungin vawi ruk Champions League semi final a thleng thei a, Spanish manager hian kum 2013 a Jupp Heynckes a thlak hnuah record a nei ṭha chhunzawm hle. Bundesliga match 63 an khelh tawh aṭangin vawi li chauh chak loh an la nei a ni.

Minute 27 a tawk

First leg-ah 3-1 a an chak loh avangin Bayern tan goal thun hmen a ngai, a tlem berah goal hnih tal an thun a ngai. Champions League-ah goal hnih thun hi thil awlsam a ni lo a, mahse an mamawh zat goal hi minute 27 chhungin an thun tling nghal.

Vengtu nei lo midfielder Thiago Alcantara chuan minute 13-na lekah Juan Bernat-a cross ball chu a tauh goal nghal. Porto an insiamrem hman lo corner aṭanga ball lokal chu Holger Badstuber chuan tauh pheiin he ball kang hi defender Jerome Boateng chuan Porto goal-ah a tauh lut. Robert Lewandowski chuan minute 27-ah an goal thumna a tauh lut ve leh a, Bayern-in 3-0 in hma an hruai. Inkhel hmasa nen belh khawmin 4-3 a ni der tawh. Minute 27 an khelh zawh meuh chuan semifinal lut tur a hriat ti tih der tawh.

Goal thum dang

Bayern-in an la duhtawk mai lo a, minute 35-ah Muller a hun a thleng ve ta, box pawn aṭanga a ball pet na vak lo chu an lo dan pial avangin ho angreng takin Porto goal-ah a lut. A hnu minute li a liam tihah Lewandowski kan hmu zui nghal zat a, Philip Lahm chuan mual veilam sir aṭangin fing takin Muller a pass a, Muller hian ṭha tak a cross nghalin Lewandowski finishing ṭha tak kan hmu theih phah a ni.

Guardiola nau ten first half-ah an dinhmun an siam fel tawh avangin second half-ah inkhel hmuhnawm kan hmu tawh lo. Porto tan captain Jackson Martinez chu minute 73-ah a rawn inlar zawk a, Hector Herrera cross ball chu hnai set sawt aṭangin a tauh goal a, Porto beiseina thi hnu a ti nung thar ve leh.

Porto hian beiseina nei thar ve leh mah se cental defender Ivan Marcano chu minute 87-ah Alcantara a tih tluk avangin yellow card pahnihna a hmu a, hnawhchhuah zui a ni. Marcano free-kick chawi pet tur hian midfeilder Xabi Alonso a rawn ding chhuak a, ani hian Bayern goal rukna chu mawi takin a thlawh lut leh a ni.

Eng nge an sawi?

Porto manager Julen Lopetegui chuan, "Kan player pawimawh Danilo, Alex Sandro leh Cristian Tello te kan chhawr thei lo a, a harsa hle a ni. Mahse kha chu chhuanlam tling a ni lo. Inkhel bul kan ṭan chhe em em a, team ṭha Bayern te ang kan hmachhawn a nih chuan minute 90 chhung ṭha taka a kan khelh theih a ngai a mah se chu chu zaninah khan kan ti thei lo a ni. Bayern ka lawmpui a, an kal leh zelna turah duhsakna ka hlan e," tiin a sawi.

Bayern manager Guardiola chuan, "Ka player te ka chhuang takzet a ka tan chuan 'hero' vek an ni. Porto kha kan hneh let thei a ni tih kan inhrilh ngun a, a takin kan hneh thei tih kan lantir. Tunah chuan nomawi chawi tumin theihtawp kan chhuah zui ang," tiin a sawi.

Hre tawh ngai em?
Thawhlehni zana Champions League quarterfinal-a inkhel Barcelona, Paris St Germain, Bayern Munich leh FC Porto manager Luis Enrique, Laurent Blanc, Pep Guardiola leh Julen Lopetegui te kha Barcelona tan an khel vek tawh a, English manager ropui Sir Bobby Robson-a chher chhuah vek an ni.