Dr TAo Football Ruahsur hnuaiah Mizoram chak zo lo

Thawhlehni zan khan DSA Ground, Silchar-ah Mizoram leh Meghalaya te'n 2014 Dr TAo Football Final Rematch an khel a, goal a lut lo. Vawiin tlai dar 4:30 hian Mizoramin an match hnihnaah Tripura an hmachhawn ang.

Group 2-ah Manipur-in hma an hruai mek a, anni hian an match hmasa berah Tripura 1-0 in an hneh a, zanin hian Meghalaya nen an inkhel ang.

Ruahsur hnuaiah

Mizoramin 4-5-1 formation an hmang a, keeper-ah tawnhriat nei ṭha Vanlalhruaia a awm. Defence-ah MS Dawngzela, TC Vanlalhruaia, Lallawmzuala leh Lalrinzuala te an intlar a, midfield lai pathum chu Johny Lalfakzuala, Lalnunmawia leh MS Dawngliana te an ni a, a sir lamah R. Laldanmawia leh Lalfakzuala te an awm a, forward-ah Mizoram Police forward Lal­nunmawia a mal tlat.

Ruah a sur nasat avangin field a nal a, inkhelh tawp tir a nih bawk si loh avangin team pahnihin game mumal an khel thei lo. Mizoram an chungnung zawk a, Danmawia, Nunmawia leh Fakzuala te'n chance ṭha an hlah a, minute 90 chhungin goal a lut lo.

Mizoram coach HC Zarzoliana chuan, "Tih ngaihna thlawt a awm lo a ni. Tui tling chungah kan inkhel a ni ber a, kan thiamna angin kan khel chhuak thei lo. Chutihrualin vanneih ṭum chu nise chak tur chu kan niin ka hria, goal thunna tur chance ṭha ṭum ruk kan hlah a, kan vanduai ṭum a ni," tiin a sawi.

Mizoram boss chuan Tripura nena an inkhel tur thlir zuiin, "Ruah a sur chuan kan chak chiang sa a tih theih loh. Khawchhe hnuaiah chuan team tin hi khelh an harsa vek a, an huphurhawm vek bawk. Tripura kan khelh hunah chuan position tinah player kan thlak danglam ang," a ti.

Dr TAo Football-a Mizoram ṭum hnih champion pui tawhtu Zara chuan mipui chungchang sawiin, "Silchar-a Mizo awm ṭhahnem takin kawr sen nen min rawn ṭawi­awm a, a thlamuan thlak khawp mai. An chungah kan lawm takzet a ni," tiin a sawi.