Arsenal-in Chelsea an hneh thei - Nicholas

Arsenal midfielder hlui Charlie Nicholas chuan Pathiannia Premier League hmahruaitu Chelsea leh Arsenal ten Emirates Stadium-a an inkhelh hunah Arsenal an chak theih a rin thu a sawi.

Nicholas chuan a pu hlui Arsene Wenger chu Chelsea an hneh theih nan a midfield thuam chak tur leh midfield laiah mi pahnih dah ngei turin thurawn a pe a ni.

Nicholas chuan, "Chelsea-ah hian player ṭha leh tawnhriat ngah tam tak an awm a, team ṭha leh hlauhawm ber te zinga mi an ni. Mahse anni hneh thei tur hian Arsenal hian player an nei ṭhain an hriam ve tawk. Ball thiam leh tlan chak Alexis Sanchez bakah player fing Mesut Ozil an neih bawk avangin an ṭha ve thawkhat hle. Pathiannia an inkhelh turah hian midfield a rorel tu zawk an dingchang in a rinawm a, chuvang chuan Wenger hian midfield laiah player pahnih dah ngei se a ṭhat ka ring," tiin a sawi.

Kar tawp inkhel khan Eden Hazard a goal hmangin Chelsea hian Manchester United chu 1-0 in an hneh a, hetihlai hian Arsenal chuan FA Cup semi final-ah Reading chu 2-1 in an lo hneh ve bawk.

Tun dinhmunah Chelsea hian point 76 hmu tawhin Premier League-ah point 10 in hma an hruai fak mek a, Arsenal hi a zawna Premier League match riat hnehna chang zawn thei an ni a, February-a Tottenham 2-1 an hneh loh hnuah hneh loh an la tawng leh lo. Chelsea hi an chak a nih chuan match nga dang khelh hmabakah champion turin vawi khat chauh chak a ngai tawh ang.