Champions League review Paris St-Germain ngam loh Barcelona

Paris St-Germain khelmual Parc des Princes-ah Barcelona 3-1 in an chak zawk a, Thawhlehni zan Champions League quarterfinal second leg Camp Nou-a inkhelhah Barca chuan 2-0 a PSG hneh lehin inkhelh pahnih belhkawmah 5-1 in an chak.

Goal thun mamawh PSG-in an thiampuipa Zlatan Ibrahimovic leh Edinson Cavani te tlar hmaah dah dun mah se goal an khung lo ve ve a, Barca tan Neymar chuan first hlaf-ah goal hnih a khung thung.

Tun season-ah Neymar hian Barca tan inelna hrang hrangah goal 30 a thun tling ta chiah a, a team te semifinal a thlenpui chiang hle.

Inkhel chu

Goal thun aia goal ven mamawh tawh zawk Barcelona-in goal khung an tum tih a lang nghal a. Tlar hmaah player langsar pathum Lionel Messi, Neymar leh Luis Suarez te kan hmu nghal ṭhawt.

Midfield-ah senior player Andres Iniesta a langsar a, ball sem kual tu leh inkhel khaikawm tu ber a ni. Ani hian Neymar leh Messi ten hmunawl an hmuh theih nan PSG tlar hnung a chhiah buai hle. Minute 14 na lekah Neymar tan fing takin ball a pe a, Brazil captain hian a hun ṭha neih hmasak berah hlah loin Barca hmahruaina goal a khung nghal.

Inkhel hmasa nen belhkhawmin Barca-in 4-1 in hma an hruai a, PSG tan duhthlan tur dang a awm tawh lo, phurh belh huam a nawr a ngai tawh. Javier Pastore leh Yohan Cabaye ten an thiam an lantir a, Barca tlarhnung an rum ṭhaih zui ve nghal. Mahse Gerard Pique leh Javier Mascherano te an ding khawng tlat a, an sutlang thei lo.

Goal thun an tum luatah PSG-in an tlar hnung an ngaihthah deuh a, Dani Alves a cross ball ṭha tak mai chu Neymar bawkin minute 34-ah a tauh goal.

Brazilian David Luiz leh a ṭhain ten an hna an tlin lo a, an ram captain an veng hneh lo hle. First half a zawh meuh chuan semifinal lut tur a chiang tawh, Barca in 5-1 in hma an hruai tawh a ni.

Minute 45 khelh tur a la awm a, PSG-in chak turin a tlem berah goal li tal am mamawh tawh. Cabaye chuan box pawn aṭangin kawh takin Barca goal-ah a pet a, mah se goal hrulah a kal liam puat ringawt. Messi kan hmu zui nghal, Neymar hnen aṭanga a ball hmuh chu Argentine captain hian PSG goalkeeper Salvatore Sirigu a sutlang zo lo.

Ibra leh Cavani an langsar lo a, a club hlui lakah Ibra a che thei lo hle. Minute 72-ah Ibra kan hmu a, ṭum danga ropui taka a pet goal na ṭhin box pawn aṭangin ṭha takin pet mah se Barca goalkeeper Marc-Andre ter Stegen-a'n a lo dan sak. Hemi hnu hian Lucas Moura leh Ezequiel Lavezzi ten hun ṭha hmu ve bawk mah se an mamawh goal erawh an hlawhchhuak zo lo a ni.

Eng nge an sawi?

Barcelona manager Luis Enrique chuan, "Inkhel bul kan ṭan ṭhat avangin thil kha a awlsam phah hle a ni. Tunah hian thui tak thlir kan tum rih lo a, zawi zawiin kan hma a inkhel tur atan chauh kan inbuatsaih rih zel ang. Champion nomawi chawi turin kawng dik kan zawh mek a ni," tiin a sawi.

Paris St-Germain boss Laurent Blanc chuan, "Hmasawn theih kan inbeisei a, first leg aia ṭha a khelh kan tum. Mahse, kan khingpui kha Barca an nih miau avangin chak theihna hun ṭha min pe duh miah lo a ni. Kan tlarhnung an khel ṭha tawk loh bakah tlarhma lam pawn an hna an thawk thei bik lo a ni," tiin an hneh loh Barca a dah sang hle.