Pathian ngaihsaktu Manny Pacquiao

May 2 khian Boxing khawvela chanchin ngah ber pahnih Manny Pacquiao leh Floyd Mayweather Jr te chu an inhnek dawn a, boxing khawvela sum tamna ber 'inhnek'ni tura beisei niin boxer pahnih hi dollar maktaduai tel tak meuh meuhin an hausak belh dawn. Mahse, chung sum leh pai hausakna zawng zawng aia Pacquiao-a'n a chhuan ber zawk chu Isua Krista a ni.

Kum 36-a upa Filipino boxer Pacquiao (pah-key-OW tia lam tur) hi division hrang hrang pariata champion thei hmasa ber a ni. Vawi 64 professional boxing match khel tawhin vawi 57 a khingpui te a hneh a, vawi 38 zet a khingpui te a 'knock-out'. Vawi nga erawh a tlawm zawkah ṭangin vawi hnih a khingpui te a inhnehtawkpui bawk.

Tun ṭuma a hnek tur kum 38-a upa Mayweather hian vawi 47 mi a inhnek pui tawhah hneh loh a la tawng lo a, mi 26 zet chu a lo 'knock out' ve tawh bawk. A chawr chhuahna khawpui ngei Las Vegas, USA-a inhnek tur Mayweather hi a sum ngah leh hausak a chapopui em avangin a mize danglam tak hian a tih lar lehzual phah hle. A hming lemah pawh 'Money' tiin an ko hial.

Pac-Man tia a hminglem an vuahsak Pacquiao pawh hi a inchei dan style, a nunphung sang tak leh nula hmelṭha tak tak a kawp kualna te avangin hriat a hlawh ṭhin hle a, tunah erawh Isua neitu a nih tawh avangin miten an hriat dan a dang ta thung.

Kum 2011-a kristian ni ve ṭan chiah Pacquiao chuan 2011-a Juan Manuel Marquez a hnek ṭumin England ram chanchinbu lar The Guardian hnenah a chak vang ai maha hlimna chhan dang a neih thu sawiin, "Vawiina ka hlimna chu kawng dik ka hmu a, ka piangthar hi a ni. Mihringte hi piangthar tura beisei kan ni. Krista chuan kan pianthar loh chuan Pathian ram kan luh theihloh tur thu min hrilh a, ka tan chuan pianthar hi a pawimawh em em a ni. Isua Krista chuan 'Kei hi kawng leh thutak leh nunna chu ka ni. Keimaha kal lo chu tumah pa hnen an thleng ngai lo' tiin min hrilh. Isua chauh hi kawng awmchhun chu a ni a, kawng dang reng reng a awm lo a ni,"tiin a nun thar neih chungchang a puang chhuak.

Pacquiao hian Fox News Sunday hnenah Isua aia dah pawi­mawh a neih loh zia sawi bawkin, "I nunah Isua i neih tawh chuan khawvel thil leh hausakna te hi chu engmah lo mai an ni a, a pawimawh ber chu Pathian chauh a ni," a ti.

A chawr chhuahna Philippines rama biak in an sak chungchang sawiin Pacquiao chuan, "Biak in kan sak chhan chu Bible in ti tura min phut vang a ni. Rethei leh hmeithai te kan ṭanpui anga, naupangte hnenah Pathian ropui zia kan hrilh bawk ang. Chu chu ti tura Pathianin min tuk sak a nih avangin ka ti zel ang," tiin chanhai zawkte ṭanpui chu Pathian thupek ang a ti a nih thu a sawi. Tunhnai khan Pacquiao chuan inhnek chauh lo pawh a thiam tih tilangin an ram mipui rethei zawk te tawrhna tilang thei tur music video a siam a, Filipino ṭawngin a zai a ni.

Pacquiao hian langsar tak taka Kristian a nihna a tlangaupui ṭhin avangin Kristian ṭha a nihna hi a larpui hle a, a facebook page lamah pawh Bible chang ṭha tak tak a phochhuak ṭhin.