Mayweather-Pacquiao ticket an la zuar chhuak lo
May 2-ah Boxing khawvela chanchin ngah ber pawl pahnih Floyd Mayweather leh Manny Pacquiao te an inhnek dawn a, mahse mipui vantlang lei theih turin official lam aṭangin ticket hi zawrh chhuah a la ni rih lo.
Mipui ngaihven Mayweather leh Pacquiao te hi MGM Grand, Las Vegas-ah an inhnek dawn a, an inhnekna tur hmunah hian mipui 16,500 leng mahse mipui vantlangin an lei theih tura ticket phochhuah tur zat hi 1,000 chauh a ni. Heti chung hian ticket hi lei theih tura zawrh chhuah a la ni chuang lo.
Thawhṭanni khan Pacquiao promoter Bob Arum chuan press conference nei mah se ticket chungchang hi zawhfiah a nih hmain press conference hi a titawp a ni.
Mayweather-Pacquiao te inhnek ticket man hi $1,500 leh $7,500 ni tura beisei a ni a, mah se ticket zuar chhawngtute chuan a man pangngai aia a let thum vela sangin an zuar chhuak der tawh thung.
Ticket zuarchhawng tu firm pakhat Precision Concierge New York chuan ticket pakhat hi $87,500 in an zuar chhuak a, a man pangngai tura beisei zat nen a inthlauhna hi a tam tham hle.
Ticket hi a man pangngai anga zawrh chhuah vek a nih pawn dollar maktaduai 72 vel hmuhchhuah beisei a ni a, Mayweather leh Saul Alvarez te kum 2013-a an inhnek ṭuma ticket aṭanga sum lut zat dollar maktaduai 20 nen chuan a in tam hleih khawp ang.
Media lam pawhin inhnek ropui tur hi an ngaihven nasa khawp a, tunah hian journalist 15,000 in a hmun ngeia he inhnek en phalna hi an nghak mek a ni.
Mayweather leh Pacquiao te inhnek turah hian Boxing a judge chal lang ber ber pathum Burt Clements, Dave Moretti leh Glenn Feldman te chuan endik hna an thawk ang.