I League 2nd Division Chanmari FC beiseina thar siamtu Biaktea

Thawhlehni tlai khan Chanmari FC leh Kenkre Sports te'n ruahsur vangin an khel zo thei lo a, minute 13 khelh hmabak awmin goal dinhmun chu 1-1 a ni. Nimin chawhnu khan Bokakhat Stadium-ah khelh chhunzawm a ni a, Chanmari FC vannei zawkin Lalbiakhlua goal hmangin 2-1 in hnehna an chang.

I League Second Division-ah MPL club-te a chung pahnih­ah an awm leh ta a, Chanmari FC-in hnehna an chan avangin Lonestar Kashmir zuan khumin pahnihnaah an inhlangkai, hmahruaitu Aizawl FC nen an inkarah point hnih chiah a awm.

Chanmari FC coach H. Vanlal­thlanga chuan, "Ruah sur tawh lo mah se field dinhmun a la ṭha lo a, khelh a harsa khawp mai. Goal awmchhun hi vei lam aṭanga Ricky-a cross aṭanga Biaktea khung a ni. Kenkre pawhin goal khungna chance an nei a, keini pawhin goal dang khung theihna tur hun ṭha kan nei," tiin inkhel chungchang a sawi.

Chanmari chakna goal khungtu Biaktea hian tun inelnaah goal kua a khung tawh a, anni aia pet goal tam an awm lo. Kenkre nena goal dang zawk khungtu Malsawmfela'n goal nga a khung tawh bawk.

Chanmari FC dinhmun sawi zuiin Thlanga chuan, "Kan khelh ṭhat chhoh zel ka beisei a, I League khelh hi kan la tum tlat a ni. Player an dam kim chho a, kan khelh ṭhat chhoh tial tial ka ring. Chanmari ṭantute khan min thlah thlam lo a, min ṭan chhunzawm zel turin ka ngen tak meuh meuh a ni," tiin a sawi.