I League U19 Chanmari leh Mohun Bagan inhnehtawk

I League U19-ah Chanmari FC U19-te'n Thawhlehni zan khan an match hmasa ber an khel a, Mohun Bagan U19 nen 1-1 in an inhnehtawk. Zanin dar 8:15 hian United SC U19 nen an match hnihna an khel ang.

Chanmari U19-te'n final round hruai thlengtu K. Lalchhanhima hrem vangin an chhawr thei lo a, tlar hmaah Lalawmpuia leh Lalruatfela te an inkawp. Mohun Bagan U19 te'n inkhelh ṭantirhah crossbar an pet per nghal a, Mizoram rawlthar Lalremruata khelhna hian inkhel an thunun bawk. Chanmari FC U19 an insiamrem thuai a, midfield inbeihna inkhelah goal chance a tam lo.

Second half ṭan chiahah Mohun Bagan U19-in goal an khung nghal a, Chanmari U19-in minute 15 hnuah Ramhlun South forward AwP-a penalty hlawhchhuah chu Lalrinsanga'n goal-ah a chantir a, 1-1 a ni.

Minute 15 khelh tur a la awm tihin Mohun Bagan U19 player pakhat chu hnawhchhuah a ni a, Chanmari U19 te'n an tam zawkna an hmang ṭangkai lo. Hun tawp hma hretin Rinsanga freekick petin crossbar a per a, a goal lo.

Chanmari U19 coach Samuel Lalrinzuala Sailo chuan, "Mohun Bagan nen kan inkhel tawk a, vanneih ṭum chu nise chak thei tur kan ni. Ka hmuh dan chuan Kolkata club hian artificial turf-a khelh an harsat a, chu chu kan vanneihna a ni," tiin a sawi.

Zanina Chanmari hmachhawn tur United SC U19 hi Kolkata club tho an ni a, qualifying round-ah Mohun Bagan U19 chungah an awm.