Mizoram Super League Zaninah team hmuhnawm Tuikual leh final lut Zarkawt
Samsung 3:16 Plan Solution Mizoram Super League hmawr an bawk hnai a, zanin dar 8:00-ah Hawla Indoor Stadium a lun leh dawn. Fans nei ṭha pahnih Tuikual South BC leh Zarkawt BCA te an inkhelh dawn vang a ni.
Tuikual South BC hi play-off aṭanga MSL inhlangkai an ni. MSL khelh a nih hma khan a ti kimtu mai nih an tum loh thu an lo sawi tawh a, an thusawiah hian an ding nghet. Vawi kua inkhelh tawhah vawi li an khingpuite an hneh thei a, vawi nga chak lo mahse MSL table-ah pathumna an ni mek. Tuikual South hi an inkhel thlir kir chuan an thiam tih a chiang a, an fimkhur tawk loh vangin an kuta point awm an thlauh ṭhin mai zawk a ni. MSL season hmasa bera an match hnuhnung berah chak loh an duh dawn lo a, zanina an khel hi a entlak khawp ang.
Tuikual South tan ṭum dang ang tho in Vanchuangpuia hi an innghahna a ni lehin a rinawm a, captain F.Zodinthara'n a nau te a rawn ho leh a nih ngat chuan Zarkawt BCA tan a ni hi buaipui tham a ni ang.
Final luh chian tawh vang maiin Zarkawt BCA an inthlahdul a rinawm loh. Inkhel hnuhnung bera chak lo chunga final hmachhawn an duh dawn loh avangin an players ṭha te nen an rawn thawkchhuak leh ngeiin a rinawm.
Zarkawt mipui tan final khelh tur hmabak la nei Zarkawt BCA player te auh phur a pawimawh ang. Zarkawt team dang Zarkawt Serpents in beisei tur an neih tawh loh avangin Zarkawt mipui tan an veng ti hmingṭha thei tu Zarkawt BCA au phur tura zanina Hawla Indoor Stadium pan hi a sual lo. Zaninah ṭantu mipui an ngah phawt chuan BCA player te'n final khelh an huphurh loh phah ngei ang.
Zarkawt BCA tan Dawrpui Vengthar tlangval Dennis Lalawmpuia a ṭangkai lehin a rinawm a, Ramthar tlangval Zorinsanga'n a rawn thlawp ṭhat bawk chuan Tuikual South lam tan ven uluk an ngai ve viau ang.