Ronaldo hoin Juve an kal fal

Cristiano Ronaldo goal hnih khung hmangin Juventus chuan an mikhual Parma 2-1 in an hneh a, coach Maurizio Sarri naute hi anmahni hnaih bertu Inter Milan aia point lia sang falin Serie A hmahruaitu an nih chhunzawm.

Pathianni zan inkhel dangah Inter hi Lecce nen 1-1 in an inhnehtawk, beiseina sang tak nena league nomawi an um lai chu an hlat leh hret. Inkhel inhnehtawk takah AC Milan chu Udinese lakah 3-2 a chakin; Bresica striker Mario Balotelli chuan hnawhchhuah a tawk bawk.

Season riat chhung zet chu Serie A nomawi an chawi tawh a, kuminah pawh Juventus hi champion tura rinkai ber an ni. Mahse, Antonio Conte kaihhruai Inter Milan chuan an thlahfal duh lo, champion chiang a la sawi theih lo.

Table chung lam inel boruak sangah Juve an buai ve lo a, forward Ronaldo-a'n tun hnaia league match khelh hnuhnung pasarihah goal khung vekin a club a chakpui - nuamsa taka chak erawh an ni bik lo thung.

Portugal captain goal khung inkarah Parma tan Andreas Cornelius-a'n an siphurh a sut ṭhen a, Juventus keeper Wojciech Szczesny chuan harsa taka Jasmin Kurtic  goal khung tur a dan bakah defender Matthijs de Ligt pawhin Mattia Sprocati tih goal ngei tura ngaih a dang bawk.Kum 2005 khan David Trezeguet chuan Serie A match vawi kuaah ngawt a zawnin goal a khung thei a, France international hlui hnuah chuan Ronaldo hi Juve player zinga a zawna league goal khung rei leh thei a ni.

Lecce captain Marco Mancosu-a'n minute 13-na leka a goal khung chu Inter Milan lamin an sut mai thei lo, point thum an hloh ngei dawn nia a lan hnuin Inter tan Alessandro Bastoni chuan minute 71-naah a sut hram - point khatah an lungawi a ṭul.

Inter manager Conte chuan, "Player tlan chak, che rang leh huaisen kan nih a ngai. Tun ṭum kan inkhelah kha chuan kan che rang tawk lo a, kan tlan muan avangin point thum hlawhchhuah kha a harsa a ni. Chutihrualin khel chhia tia sawi tur erawh kan ni bik lo," tiin a sawi. Team pahnih goal awm loa an inhnehtawk laiin Inter midfielder Stefano Sensi chuan handball vangin penalty a chawi, referee Piero Giacomelli-a'n penalty pe hman mah se Video Assistant Referee (VAR) hman a nih hnuah hnawlsak an ni hlauh. Inter hian goal khung theihna hun ṭha chu an insiam nual, midfielder Marcelo Brozovic chuan goal ban a tih per dawp. Lecce midfielder Filippo Falco pawhin freekick ṭha takin pet mah se ban a per ve tho bawk.

Nungchang mawi lo vanga sawi hlawh ni fo Mario Balotelli-a'n a mizia a la thlak lo. Italian striker hi bench aṭangin minute 74-naah dah luh a ni a, hetihlai hian Bresica leh Cagliari te 2-2 in an inhnehtawk mek.

Goal khung beisei vanga dah luh Balotelli hian an beiseina a tihlawhtling lo, khelmual a luh aṭanga minute riat hnu lekah hnawhchhuah a ni! Football a khelh hun chhunga vawi 13 zet red card a hmuhna a ni chiah. Kum 29 mi Balotelli hian August thla khan Brescia hi zawmin goal nga a khungsak tawh, hremna a tawrh dawn avangin tun kar tawpa a club hlui AC Milan nen an intawn hunah chuan a inlan ve thei dawn lo.