Man United tana mangchhia belhchhah theitu Spurs

Premier League-ah Manchester United-in September 29, Pathianni zan dar 9:00 hian Tottenham Hotspur an mikhual dawn a, table thlir chuan 10-na leh 11-na chauh ni mah se tunkar tawpa inkhel en châkawm bera chhal theih a ni.

Erik Ten Hag-a hoten match hnuhnung pahnihah chak hmel an hmu lo ve ve a, Tottenham erawh Newcaslte United leh Arsenal te an hneh loh zawn hnuah match thum khel leh tawhin an la chak vek.

Intawnna hmasa

Season liam ta khan Spurs-in manager thar Ange Postecoglou hoin league match hnihna lekah Old Trafford an tlawh a, 2-0 in hnehna an chang. Pape Sarr-a'n goal hmahruai khungin Lisandro Martinez-a'n an lamah a ti lut bawk.

Kumin January 14 khan Tottenham Hotspur khelmualah an intawng leh a, 2-2 in an inhnehtawk. Rasmus Hojlund leh Marcus Rashford te hmangin mikhual team-in ṭum hnih hma hruai mah se Richarlison leh Rodrigo Bentancur te goal hmangin Lilywhites-in siphurh an sut ve ve.

United an dam ṭan

Manchester United player hliamte an dam ṭan a, FC Twente an hmachhawn ṭumin Mason Mount leh Rasmus Hojlund te bench aṭangin an lut. Danish striker Hojlund phei chu Crystal Palace nena goal awm loa an inhnehtawk ṭumin pawh a inlan tawh.

Spurs hmachhawn hunah Ten Hag-a'n duh thlan tur a ngah sawt. Hojlund-a awm loh chhungin Joshua Zirkzee-a'n goal khat chauh khung mah se Dutch manager lung a ti awi rih hle.

Ten Hag chuan, "United tana goal khungtu pawimawh a nih theih hi ka ring. A la naupang a, chutichung chuan theihna a nei sang. Ṭhiante a thlawp thiam a, goal chance a siam thiam. Chutihrualin hmasawnna tur pawh a la ngah," tiin Zirkzee chungchang a sawi a, Hojlund aia a lut leh zawk a nih pawhin a mak lo ang.

Striker thlawp turin Bruno Fernandes a awm a nih chuan midfield-ah Kobbie Mainoo, Christian Eriksen, Manuel Ugarte, Casemiro leh Mount te duh thlan turin a awm. Twente laka goal khungtu Eriksen-a'n a tihsual zui leh avangin Ugarte leh Mainoo chu bul ṭan thei tura rin an ni.

Mual sirah Marcus Rashford leh Amad Diallo bakah Alejandro Garnacho leh Antony te an awm a, Brazilian winger hi chu bench-a la awm turah a ngaih theih. Tlarhnungah Lisandro Martinez a pawimawh a, Matthijs de Ligt emaw Harry Maguire emaw nen an inkawp ang. Mual sirah awm Noussair Mazraoui leh Diogo Dalot bakah goalkeeper Andre Onana te chu, tun dinhmunah chuan khawih chet thei loa ngaih theih an ni.

En châkawm chu

Spurs hi table-ah 10-na la ni mah se an hneh loh hi Newcastle United leh Arsenal an ni a, 2-1 ve ve in an chak lo. Ange Postecoglou hote hi an chak loh ṭum hian, an khingpuite aiin goal chance an insiam hnem a, goal zawnah a pet hnem a, ball an chang hnem a, a tawi zawngin inkhel thununtu an ni ve ve.

Hei vang hian Arsenal an hneh loh zawhah pawh Postecoglou hi a ṭawng pawr viau. Australian coach Postecoglou chuan, "Season hnihnaah chuan nomawi ka chawi ziah," tiin a sawi a, kuminah pawh Spurs tan nomawi chawi ngei a tum.

Postecoglou hian kum khat aia tam a enkawl team South Melbourne, Autralia Under 17 leh Under 20, Brisbane Roar, Melbourne Victory, Australia, Yokohama F. Marinos leh Celtic te chu nomawi a chawipui vek a, ṭawng pawr thei dinhmunah a ding.

Spurs hian player an nei chhelo a, position tinah inghahna tlak an nei vek. London club-in Son-a an chelh thei hi chanchin lawmawm a ni a, striker thar Solanke pawhin match zawnin goal a khung tawh - Man United tan hna a awlsam dawn lo.