Basketball mawina belhchhahtu Rose par a chul ta

MVP hlui Derrick Rose chuan kum 16 chhung a khelh hnuah NBA khelh a chawlhsan thu a puang. Kum 35 mi Rose hian NBA khelhna khawpui paruk Chicago, New York, Cleveland, Minneapolis, Detroit leh Memphis tualchhung chanchinbu phek hmasa ber phek hmasa berah phek tluanin amah ṭantute chunga lawmthu sawina a tichhuak.

Chicago khawpuia piang, Chicago Bulls aṭanga hming chher Rose hian Memphis Grizzlies-ah a hun tawp a hmang a, kum khat contract la nei mah se Grizzlies hian tihtawp an remtihsak. Rose hi 2008 draft khan no. 1 overall pick a ni a, Bulls-in an lalut. Feet ruk leh inches thuma sang Rose hi a hmuhnawm a, a thiam a, basketball ngainatute mit a la hle.

Rose hi 2008-09 season-ah Rookie of the Year a ni a, a hnu season thumah All Star-ah a tel. 2010-11 season khan kum 22 mi chauh niin MVP a thlan a ni a, MVP ni thei naupang ber a ni. Mahse, 2012 playoff-ah a khup a tih hliam avangin Rose hi a nih tur ang a ni thei lo a, a vul chhung a rei lo.

Inhliam vangin season khat tawp a awl a, 2013-14 season-ah pawh match 10 bak a khel lo. Kum riat chhung Bulls tana a khelh hnuin New York Knicks a zawm a, ngai a awh thei ta lo - club hrang hrang Cleveland Cavaliers, Minnesota Timberwolves leh Grizzlies tan a khel leh bawk. Rose hian match 723 a khel a, chawhrualin 17.4 points leh 5.2 assists a nei a ni.