Ngamtu tawng lo Chanmari

I League 3 chu duhthala Chanmari FC talna tura duan emaw tihpalh mai awl tak a ni - Mizo club hian Indian football fourth division inelnaah match ruk khel tawhin an la chak vek!

Chanmari hian nimin khan Punjab champion Dalbir FA chu 3-0 in an sawp a, final round-a match hnih an khelh tawhah Mizo club an la chak ve ve. MPL club tan Vincent Lalduhawma chuan goal hnih khungin, Lalkhawpuimawia'n goal khat a thawh bawk a, Kalyani Stadium-ah CFC an chak chiang hle.

Lalsangzuala Hmar enkawl team hian inkhel ṭantir aṭangin an nawr nghal a, minute 12-naah Mapuia hmangin an khung nghal. Kelkang striker hian Vincent-a cross duhthusam chu a awmna tur takah lo awmin, goal ruakah a khung.

Dalbir-in goal an chhuah hma a, an tho leh tawh lo. Minute 52-naah Vincent-a hun a her chhuak a, defender tawnhriat nei ṭha Sena Ralte cross aṭanga ball kal chu ṭha zetin a tauh lut.

Baktawng/Tlangnuam tlangval Vincent hian minute 69-naah an goal thumna a khung chhunzawm - he goal luh theih nana Lalrokima ball pek chu duhthusam a ni a, Vincent-a ball dawn dan leh finishing chu sawiselbo a ni.Chanmari forward Vincent hian I League 3-ah goal ruk a khung tling ta a, top scorer ni turin chance a ṭha ta hle.

Nimina group B inkhel hmasa zawkah SAT Tirur chuan 3-1 in GMSC an hneh bawk a, match hnih aṭanga point ruk neiin Chanmariin hma an hruai mek - Pathianni zing dar 9:00-ah Abbas Union an hmachhawn lehnghal ang a, an chak chuan I League 2 khel turin an tling ang.