Player 10-a khel Spurs an chak

Europa League-ah Tottenham Hotspur-in player 10-a khel chungin Qarabag FK chu 3-0 in an sawp. Tottenham Hotspur Stadium-ah mualneitu defender Radu Dragusin chu minute sarihna lekah hnawhchhuah ni mah se London club tan Brennan Johnson, Pape Matar Sarr leh Dominic Solanke ten goal khat ṭheuh an khung.

Spurs-in ball an chang tam nghal a, minute sarihnaah mual laiah Dragusin-a'n ball changin Juninho-a'n a chhuhsak a, Romanian defender hian Qarabag striker hi a titlu. Referee Willy Delajod-a'n zahngaihna lantir loin Drajusin a hnawt chhuak nghal.

English club-in tlem zawk chungin Azerbaijan club an la khel tawk a, goal hmaah an la hriam zawk bawk. Solanke thawhrim rah sengin Brennan Johnson-a'n minute 12-naah a khung a, minute 52-naah Dejan Kulusevski-a corner pet chu vengtu nei lo Sarr-a'n a khung.

Qarabag striker Juninho-a'n chance ṭha bik a hlah a, an penalty hmuh hlah lah chu Tural Bayramov-a'n a pet over. Spurs erawhin minute 68-naah goal thumna an khung a, Son Heung-min ball pet chu keeper Mateusz Kochalski-a'n dang perin Solanke-a'n awlsam takin a khung.

Spurs hian Qarabag zawh hian Ferencvaros, AZ, Galatasaray, Roma, Rangers, TSG Hoffenheim leh IF Elfsborg te an hmachhawn dawn a, an fixtures a awlsam lo. Champions League ang thoin Europa League-ah pawh kalphung thar an hmang a, team 36 awmin team tinin match riat ṭheuh an khel dawn.