Zanin dar 10:00-ah Bundesliga final : Bayern Munich Vs Bayer Leverkusen

Season liam ta khan Xabi Alonso enkawl Bayer Leverkusen-in Bundesliga-a Bayern Munich rorelna an titawp a, German football chauh ni loin khawvel football ang pawhin Alonso hote zinkawng hi ngaihnawm a tling. Bavarians-in Leverkusen lakah an lallukhum lak let leh tumin Vincent Kompany an lalut a, Belgian tactician hoin bul an ṭan hle.

German club ṭha pahnih hi zanin dar 10:00 hian Bayern-in Allianz Arena-ah Leverkusen an mikhual dawn a, 'Bundesliga final' tia chhal theih a ni a, Kompany tan fiahna hautak hmasa ber a ni thei ang.

Tuchel-a tihsual

Season liam ta khan Thomas Tuchel-a'n Bayern Munich nomawi a chawipui lo a, nomawi duha Bavarians zawmtu Harry Kane tan pawh a hrilhhai thlak khawp ang. German football thununtu Bayern meuhin nomawi an chawi loh chuan Tuchel-a'n tihsual a nei tih a chiang.

Tuchel-a'n player-te ngaihnat Julian Nagelsmann a thlak a, bul a ṭan dan a fuh lo. PSG leh Chelsea enkawl tawhtu Tuchel meuh tan pawh player ṭha rual awm khawmna Bayern enkawl a harsa. Chutihrualin Bayern hian Bayer Leverkusen an mikhual ṭumin ṭum hnih hma an hruai a, mahse Alonso hote hian an sut ve ve. Siphurh sutna goal phei chu injury time-a penalty aṭanga Exequiel Palacios khung a ni.

Bayern hian Leverkusen hi hneh ta se, Alonso hote hian nomawi an chawi kher a rinawm loh. Hei chauh hi a lo, kumin February 10 khan BayArena-ah Bayern hi an lenglut a, chak se, champion-na kawng zau tak a la inhawng. Mahse, hun pawimawh Bayern hi an elpui Leverkusen lakah 3-0 in an tlawm. Tuchel-a'n a elpui Leverkusen laka nga ngawt a hloh hi a tihsual lian ber tiin a sawi theih.

Beiseina thar

Bayern-in manager lak tur an van a, German club lian hi hnawltu an ṭhahnem. Bavarians-in Premier League aṭanga Burnley tlakpuitu Vincent Kompany an lalut a, mak tih a hlawh hle. Kompany hian manager angin sulhnu nei ṭha tawk lo mah se Manchester City-in tun dinhmun a thlen theihna chhan player pawimawh bik a ni.

UCL-a Dinamo Zagreb 9-2 a hneh zawhah Kompany chuan, "Brussels-a piang ka ni a, ka pa hi Congo aṭanga raltlan a ni. Ka bul ṭanna thlir hian Premier League-a khelhna chance chu engzat nge ni ang? nomawi ka chawi theihna chance chu eng zat nge? ram tana ka khelhna chance a awm em? A nihna takah chuan 0.000 chance ka nei a, ka ti hlawhtling a sin.

"Tunah coach ka ni ta a, mi min sawi leh selna vang ringawt hian ka theihna ang hi ka ringhlel ang a, ka hlawhtlinna chan theih tur hi ka kalsan dawn tihna a mi? Hnai lo e. Ka rilru put hmang chu, hma lam panin ka kal zel ang. A tawpah ka hlawhchham a nih chuan ka hlawhchham a ni mai a, ka hlawhtling a nih pawhin ka hlawhtling a ni mai. Chutihrualin hma erawh kan zawn zel thei," tiin a sawi a, Belgian manager hi a thusawi avanga ngaisantu an tam pha hle.

Kompany hi a ṭawng pawr satliah lo a, result ṭha a nei bawk. Tun season-ah Bayern hian inelna hrang hrangah match ruk an khel tawh a, an la chak vek. Match ruk an khelhnaah hian an chak satliah lo - goal 29 khungin goal nga chauh an la chhuah a, match tina goal 4.83 khung ang an ni pha hial.

Season tir chauh la ni mah se Bayern-in inrintawkna an ngah a, Bundesliga-ah ringawt Harry Kane-a'n goal nga a khung tawh. Player thar Michael Olise-a'n league-ah goal thum khung tawhin inelna hrang hrangah goal nga a khung tawh.

Jamal Musiala a hmuhnawm a, Thomas Muller leh Serge Gnabry te pawh an ṭangkai. Kompany hnuaiah player naupang zawk leh kum upa zawkte an che ṭha a, season tir chauh la ni mah se Bayern khelh tawh dan thlirin champion nomawi an laklet a rinawm leh ta hle.

Leverkusen an thiam

Bayer Leverkusen-in hneh loh tawng loin Bundesliga nomawi an chawi a, kuminah erawh RB Leipzig lakah an tlawm der tawh. Vawi khata an chak loh avangin Alonso hote hi an chhe ta duai tihna a ni lo.

Leverkusen hian Leipzig tih loh, an khingpui dang zawng chu an hneh vek. Alonso hote hi Champions League-ah pawh an inthlahrung lo a, khualmualah Feyenoord 4-0 in an sawp. Season liam ta team khaipa Florian Wirtz-a'n hma a sawn leh hret a, tun season match-a match sarih a khelh aṭangin goal ruk a khung der tawh. Bundesliga bikah match liah goal li a khung a, amah ang bawka thiam Musiala nen zaninah en bik an hlawh ang.

Levekusen tan tlarhnungah Jonathan Tah, Alex Grimaldo, Jeremie Frimpong leh Edmond Tapsoba te an pawimawh a, midfield-ah Granit Xhaka-a tawnhriat a pawimawh a, striker-ah Victor Boniface a awm. Alonso hote hian match hnuhnung pathumah goal li a khung vek a, goal khung kawngah harsatna tawk lo mah se Bayern meuh hneh tur chuan tlarhnung rem phui a ṭul ang.