Saka tan record siam theihna remchang

Bukayo Saka chuan Premier League record siam theihna remchang a nei dawn, zanin dar 7:30 hian Leicester City an lo mikhual dawn, a ṭhiante goal khung tur a siamsak thei a nih chuan mellung pawimawh a phun ang.

English football inelna sang berah hian, season tir lam match hmasa pangaah Thierry Henry chuan a ṭhiante khung tur a lo siamsak tawh a, record dinglai hi tun dinhmunah Saka hian a nihrual mek - pet khata kal fal turin Foxes lakah assist neih a ngai tihna a ni.

Arsene Wenger a chhawl a, amah thlaktu Unai Emery khan Saka tan hian hun ṭha a siamsak - Emery chhuah hnuah Mikel Arteta chuan Saka hi a chher hriam lehzual a, kum 23 mi chauh ni mah se player puitling takah a chher chhuak.

England international hi a dam a nih phawt chuan a inkhel ziah a, thlak pawh a ni ngai meuh lo. Kar laihawlah League Cup khel mah se zaninah pawh a bul ṭantu zingah a tel leh ngei a rinawm, record siam theih chu a duhthusam a ni ngei ang.

Arsene Wenger hun hnuhnung lamah khan Arsenal hian Premier League nomawi an chawi teuh hle, mahse an champion loh ṭum hian Leicester City hian khawvel barakhaihin nomawi a chawi daih.

Jamie Vardy hoin Foxes an champion a, English striker hi Gunners nen indawr viau mah se a chhuak ta lo. Leicester hi EPL aṭangin an tlahniam a, tun season atan an rawn kai thar ve leh chiah - Vardy chu an hmatawng a la ni reng.

Foxes tan Emirates Stadium-a chak chu thil awlsam a ni dawn lo. Steve Cooper-a naute hian tun season EPL match nga an khelh tawhah chak ni hmel an la hmu miah lo a, point thum aiin point khat hmuh tuma khelh a fuh zawk mai thei.

Steve Cooper chuan, "Tun hnai kum thum chhung vel chu Arsenal hi team khawng tak an ni a, tun season pawh nomawi inchuh zinga mi an ni. Tun ṭumah pawh hian inkhel awlsam beisei chi a ni dawn lo.

"Chutihrualin, team ṭha kan hmachhawn avangin kan zam ngawt tur a ni lo, nuamti takin football kan khel tur a ni a, engmah hlauh nei loin match kan hmachhawn ang," tiin a sawi.

Tun hnaiah Arsenal hian match hautak an hmachhawn nasa a, League Cup-ah erawh hna a hautak lo. Leicester City hnuah hian Paris Saint Germain nen Champions League a khel zui leh dawn, player siksawi thiam a pawimawh dawn a ni.