Remsanga'n Mohammedan a chakpui

Mizo forward Lalremsanga Fanai chuan Indian Super League-a a goal hmasa ber a khung a, I League champion Mohammedan SC chu ISL-ah a vawi khat nan hnehna a chanpui - Kolkata club hian khualmualah Chennaiyin FC chu 1-0 in an hneh.

Remsanga hian minute 39-naah goal hi a khung. Chennaiyin defender PC Laldinpuia chuan goalkeeper Samik Mitra ball a pe a, Chennaiyin keeper hian ball kal dan a chhut sual - player tlan tam leh thawkrim Remsanga chuan hei hi a nang fuh a, goal-ah a chantir zui.

Aizawl FC aṭanga hming chher, Lengpui tlangval Remsanga hian Mizo club a chhuahsan hnuah, 2022-23 season kha I League club Rajasthan United-ah a khel a, hemi hnuah hian Mohammedan hi zawmin season hmasa kha a khel.

Kolkata club tan hian inelna hrang hrangah match 23 khela goal riat khungin, assist vawi li a nei a, ISL an khelh theih nan a thawhhlawk hle. Mohammedan-ah a cham chhunzawm a, coach Andrey Chernyshov-a'n ringtawkin, match thum an khelh tawhah bul a la ṭantir vek.

Spartak Moscow boss hlui rinna Remsanga'n a chhanglet a, tunah chuan ISL-ah goal a khung ta - Ningani zan inkhelah hian player of the match atan thlan a ni bawk a, Remsanga tan zan duhawm bik a ni.

Remsanga bakah hian Mohammedan tan captain Zodingliana Tochhawng leh Vanlalzuidika Chhakchhuak te chuan inkhel bul an ṭan a, Chennaiyin tan Dinpuia, Laldinliana Renthlei leh Lalrinliana Hnamte (Terina) ten inkhel bul an ṭan vek bawk.