Man City lakah second khat a pawimawh - Howe

Premier League champion Manchester City chuan vawiin tlai dar 5:00 hian Newcastle United an lenchilh dawn, mikhual thleng tur Magpies manager Eddie Howe chuan inthlahdah zeuh pawh a rem lo tih a sawi.

Newcastle manager Eddie Howe chuan, "Minute 95 chhung chu intlahdah miah loa kan khelh a ngai dawn, second khat lek chhung pawh thil dang kan nagihtuah a remchang dawn lo, a bik takin goal ven lam kan uluk zual a ngai ang.

"Keimahni khelmualah chuan ṭha takin kan khel ṭhin, a hma lama kan mikhual tawhnaah pawh kan khel ṭha ṭhin. Khatiang match bawk kha tun ṭumah hian lantir leh kan tum dawn a ni," tiin chak tumin Man City an mikhual dawn tih a sawi.

Pep Guardiola enkawl Man City hian an match hnuhnung berah Arsenal chu 2-2 in an inhnehtawkpui a, tun season match nga an khelh tawh china point an hlohna hmasa ber a ni, midfielder ṭha Rodri an chan tel bawk.

Rodri bakah Kevin De Bruyne chu hliam vangin a chawl mek - Ilkay Gundogan emaw Mateo Kovacic emaw zawkin inkhel bul an ṭan a rinawm a, tawnhriat nei ṭha pahnih an nih avangin an buai lo ang, chutihrualin Rodri hmunruak hnawh khah erawh a harsa ang.

Hliamin tlak buak ve mah se Man City hian squad an nei chhah a, midang chunga leng Erling Haaland an la nei bawk - EPL team dangte lakah chuan a buk rit an la ni zel, chutihrualin tun season an match khelh tawh ho thlir chuan tlarhnung lam an venṭhat ve a ngai hle thung. League bikah an match hmasa bera Chelsea an hneh bakah chu match tinah goal an la chhuah ziah a ni.