Madrid derby - A hun a thleng leh ta

Spanish football mai ni lo, European football-a inkhel ngaihven hlawh pawl thlang chhuak dawn ta ila, a tawp lamah Madrid derby hi kan dah lo tawp ang - Pathianni zan dar 12:30-ah chutiang taka inkhel ngaihven hlawh chu kan hmu dawn.

Atletico Madrid khelmualah Real Madrid an lenglut dawn a, Barcelona kal vung kara champion beisei club pahnih tan elpui point chhuhsakna remchang a ni - Real an sang zawk a, mahse, an inkarah point hnih bak a awm lo.

Diego Simeone enkawl Atlético hian Ningani zan khan league match an khel a, Celta Vigo chu minute 90-naa Julián Álvarez goal khung hmangin an hneh a, tun season inelna hrang hrangah match riat khel tawhin, tlawm an la nei lo a, an inrintawk vanglai tak a ni.

Champion lai Real-in La Liga match hmasa pathumah vawi khat chiah hnehna chang mah se, league match li chu a zawnin an chak leh tawh a, Carlo Ancelotti nauten Atletico khelmualah point thum aia tlem hmuh an tum lo ang.

Hmelma Atletico

Real tan Atletico khelmuala lenluh erawh thil châkawm zek zawk a ni lo - league match 39 zet tlawm nei loin Real hi an kal tawh a, an ngam loh hnuhnung ber erawh Atletico an ni tlat.

Inelna hrang hrangah January 18, 2024 hnu khan Real hi an tlawm tawh lo a, mahse, heta an ngam loh hnuhnung ber pawh Atletico tho an ni - Simeone-a naute hian Copa del Rey aṭangin 4-2 in an pet chhuak.

Real hian season hmasa tluan khan hneh theih loh team hnih chiah an nei a, chu chu Rayo Vallecano leh Real Betis an ni. Home & away-ah an draw ve ve a, chutihrual chuan season tluana Real hneh thei awmchhun club chu Atletico an ni tlat.

Zaninah phei chuan Atletico khelmualah an inlan dawn avangin Simeone-a naute an inringtawk ang tih a chiang a, Real Madrid lakah hian point thum aia hniama lungawi an tum lo ang.

Atletico an ṭha

Diego Simeone hoin Atletico-in tun season-ah inthuam ṭhat an tum a, nipui transfer-ah pawh an che na hle - Manchester City aṭangin striker Julián Alvarez chu pound maktaduai 80 chuangin an la lut a, kum 24 mi forward hi beisei ang tak erawhin a la khel chhuak lo.

Argentine striker hian inelna hrang hrangah match riat khelin goal hnih chauh a la khung. Hetihrual hian position hrang hrangah chhawr kual a ni a, Simeone chuan, "Khawiah pawh chhawr theih a ni a, tlarhma leh midfield-ah pawh a ṭha vek," a ti.

Alvarez hi Celta lakah bench-a dah a ni a, khelmual a luh hnuah chakna goal a khung zui. Pathianni zanah chuan bul ṭan tura ngaih a ni. Chelsea aṭanga lakluh Conor Gallagher sawi hmaih a thiang lo a, English midfielder hian match rukah goal hnih a khung tawh.

Atletico hian Euro-a Spain champion theih nana player pawimawh, centre back Robin Le Normand an nei thar a, Villarreal aṭangin forward Alexander Sørloth an neih belh bawk - Real hneh tur khawp squad chu an nei.

Real vanduaina

Season hman zawh takah La Liga leh Champions League nomawi an chawi a, Kylian Mbappe an neih belh bawk avangin Real hmabak hi nomawi chawi belh bak a ni lo, tiin an sawi hman. Mahse, he team hi tun season-ah an talbuai tlat!

Real hian UEFA Super Cup nomawi chawiin season bul ṭan mah se, an league match hmasa pathumah vawi hnih draw neiin, vawi khat chiah an chak a, a hnu match li a zawnin chak mah se fan-te lawm erawh a kim lo thung.

Spanish champion hian an match hnuhnung pathumah goal an chhuah vek a, an league match hnuhnung berah phei chuan 3-0 a hma an hruai hnuin goal hnih an chhuah leh a, 3-2 in an chak ve hram - an hmachhawn hi Alaves an ni.

Real-in tlarhnungah insiamrem an mamawh tih a lang a, Alaves laka an khelh anga an zuzi a nih ngat chuan anmahni hrem turin Atletico an inpeih at ang.

Mbappe tel lohna

Atletico lawmna tur chu hliam vangin Mbappe-a inlan thei dawn lo. French striker hi Alaves lakah a inhliam a, Pathianni zana Atletico hmachhawn turin a dam hman dawn lo.

Kum 25 mi striker hian Real tan inelna hrang hrangah match kua khel tawhin goal sarih a khung a, assist vawi khat a nei. Hetihrual hian Vinicius Jr, Rodrygo leh Jude Bellingham te ho an la awm a, Atletico tan thawven viau a fuh chuang lo.

Brazilian rawlthar duhawm Endrick pawh lam hmaih a thiang lo. Kum 18 lek ni mah se, he rawlthar hi khelmualah a tlangnel a, Real tan match sarih a khelhah goal hnih khungin, assist vawi khat a nei der tawh.

Madrid derby meuha bul ṭan nghal tur erawhin, a kum zat nen a tlin ang em? tih chu zawhna awm thei a ni a, mahse, coach Ancelotti berin, "Rilru paukhauh pu mi a ni," tiin a lo sawi tawh a, zaninah kan hmu a nih pawhin a mak lo ang.