Maresca hnuaiah hma kan sawn - Sanchez

Chelsea goalkeeper Robert Sanchez chuan an coach that Enzo Maresca kaihhruaina hnuaiah nasa takin hma an sawn tih a sawi a, zanina Brighton nen an inkhelh turah pawh result ṭha neih an beisei ang.

Nipui bazarah khan Blues hian player an lei nasa, an kawlsa ṭhenkhat chu an chhuahtir bawk - bazar hun an hman dan kha mi tam takin mak an ti, tun hnaia an inkhel entu erawhin Italian manager Marescha hian thil tum fel tak a nei tih an hria.

Blues keeper Sanchez chuan, "Maresca hian khelh duh dan a nei a, chumi tur chuan min zirtir. Hun rei lote chhungin a duh ang kan hre thuai thei a, chuvangin goal khung leh a venhim kawngah pawh nasa takin hma kan sawn.

"Mimal tak pawhin ka hlawhpui em em a, he hmun ka pan hnua ka hun ṭha ber ka tawng mek niah ka ngai. Chelsea ka zawm tirh khan ni thum ka training hnuah Liverpool ka hmachhawn nghal, ka hun hmasa lam kha chu a awlsam lo.

"Tun season erawh a bul ṭan hma aṭangin inbuatsaihna ṭha ka nei hman, boruak a danglam tawh hle. Coach min khelh tir dan phung hi nuam ka tih chi a ni bawk, min ring ngamtu tana inkhelh chu a nuam," tiin a sawi.

Chelsea hian inelna hrang hrang an match hnuhnung pathumah goal kua a khung a, anmahni lamah a lut ve miah lo. Brighton an hmachhawnna tur hi Stamford Bridge a nih avangin point thum hlawh chhuak thei tura ngaih an ni.