VVD, Arnold & Salah kan nei hi ka lawm - Slot

Liverpool player pawimawh pathum, captain Virgil van Dijk, Trent Alexander-Arnold leh Mohammed Salah ten season tawp rualin Anfield-ah an contract an hmang zo tawh dawn a, tun thlenga contract thar zawrh an la nih loh avangin sawi a hlawh hle.

August thla khan Van Dijk hian contract thar zawrh a nih loh chungchang a sawi chhuak a, Salah hian season ṭan hnuah a sawi bawk - Arnold hi Real Madrid nen sawizawm mek a ni a, amah hian Anfield-a cham a duh niin an sawi.

Hemi chungchangah hian Reds coach Arne Slot chu ṭawng chhuakin, Dutch coach chuan, "Anni ang player pathum ka nei thei hi ka lawm hle. Match khelh tur tam tak a la awm a, enge thleng zel chu kan hria ang chu," a ti a, engmah a sawi chiang duh lo.

Van Dijk hi kum 33 mi a ni tawh a, Salah hi kum 32 a ni tawh. Player pahnih hi an kum a tam tawh bakah club-a player hlawh hnem pawl an ni a, Reds thuneitu lamin inngaihtuah nana hun an duh hi an demawm hran lo - Arnold erawh contract thar ziak ngei tura beisei a ni.

Liverpool hian zanin dar 10:00-ah Wolverhampton Wanderers chu khelmualah an lenchilh dawn. Slot hoin league match ngaah vawi li an chak tawh a, rin loh takin Nottingham Forest lakah an tlawm tawh thung - champion tum tan team tenau laka chetsual a pawi thei.

Slot chuan, "Forest lakah kan tlawm tih lohah chuan season bul kan ṭan ṭha viauin ka hria," a ti a, a naute khelh dana a lawm thu a sawi.