Inrintawkna ka nei sang - Martin

MotoGP rider championship hmahruaitu Jorge Martin chuan a ṭha thei ang bera season tawp khar ngei a tum a, kumin tir lam ai chuan inrintawkna pawh a neih belh nasa hle tawh tih a sawi bawk.

Bike intlansiakna sang berah hian Martin-a hian point 341 hmuin hma a hruai mek a, amah hnaih bertu Francesco Bagnaia chuan point 317 a hmu thung, hmabak an la neih nual avangin Enea Bastianini leh Marc Marquez te pawh sawi bo an rem lo.

Kum 26 mi Jorge Martin chuan, "Team lamin min thlawp ṭha em em reng a, engtiang in nge hma ka sawn theih ang tih hi min ngaihtuah pui nasa hle. Intlansiak vawi khat tihsual pawizia kan hrechiang, chuvangin fimkhur takin kan kal ang.

"Season tir lam kha chuan tlan ṭha tho mah ila ka nghet tawk lo deuh, tunah erawh inringtawk takin bike ka khalh a, hlauthawng miah loa inelna hmachhawn hi chuan rah ṭha a chhuah ṭhin," a ti.

Pathianni chhun dar 12:30 hian Mandalika International Street Circuit-ah Indonesian Grand Prix an tlan leh dawn, bike intlansiak hmuhnawm tak an chhawpchhuah leh ngei a rinawm.