Ka naute khelh dan hi mak ka ti lo - Conte

Antonio Conte chuan hun rei vak lo chhunga Napoli an insiamṭha thei chu mak a ti lo a, inbuatsaihna an neih ṭhat bakah player tin ten hmasawn tuma an beihna rah chhuah a lo lang niin a sawi.

Serie A champion an nih hnu season khatnaah Naples club hi an talbuai nghal a, a sang zual pali zingah pawh an tel phak lo. Indinthar leh tumin Conte an ruai, tunah a rah a lang chho mek.

Italian football inelna sang bera an match hmasaah chesual nghal mah se an insiamṭha leh tawh, pahnihna dinhmun an luah mek. Player ṭha tam zawk hahchawlhtir chungin Coppa Italia an khel a, an khingpui Palermo chu 5-0 in an sawp thei tho.

Napoli manager Conte chuan, "Nitin hian hmasawn tumin theihtawp kan chhuah, training kan nei ngawrhin player tin ten an theihna anj pholang ṭhin, an training lao hmutu tan chuan khelmual chhunga ka naute chet dan hi a mak hran lo.

"Kan ṭha ta vek e tihna erawh a la ni lo, ka sawi tawh ang khan nipui bazar kan neih rei avangin team insiamnghet turin hun kan mamawh rei. Tunah pawh hmun ṭhenkhat laiah chuan insiamrem kan la ngai nasa," tiin a sawi.

Naples club hian Serie A match vawi nga an khelh aṭangin point 10 an hmu a, an tluk loh chu point 10 neitu Torino chauh an ni. Champion lai Inter Milan bakah Juventus te an chesual ve zauh ṭhin, nomawi inchuhin an inum tawk hlawm hle dawn niin a lang.

Conte enkawl Napoli hian Pathianni zan dar 12:15 hian league match khel turin Monza an lo mikhual ang.