LZ Juice MPL11 Judgement Day

LZ Juice MPL11 league round chu vawiin hian khelh zawh a ni dawn a, RG Stadium-ah inkhel pali a awm dawn. Kumin hi MPL history-a league round-a goal luh tam ber ṭum a ni a, table ngaihnawm ber ṭum a ni bawk. Round 14-ah league winner a la chiang lo a, semifinal hmunruak pali chu team pangain an inchuh a, relegation playoff khel tur a la chiang lo.

Vawiin hi MPL11 Judgement Day a ni a, thil chiang lo zawng zawng tih chian ni a ni ang. Chawhma dar 10:00-ah Chanmari FC leh FC Bethlehem; chawhnu dar 1:00-ah Mizoram Police leh Ramhlun Athletic; tlai dar 4:00-ah Sihphir Venghlun leh SYS FC; zan dar 7:00-ah Aizawl FC leh Chawnpui FC te an inkhel ang.

Tualchhung football tui chin tan chuan RG Stadium pan a fuh ang a, Mualpui pan hman lo tan pawh Zonet Zawlbuk leh Empai kaltlangin a en theih dawn.

Quarterfinal hnuhnung zawk
Sihphir Venghlun FC Vs SYS FC

Tlai dar 4:00-a Sihphir Venghlun FC leh SYS FC inkhel tur hi en châkawm ber tura chhal theih a ni. Team pahnih point hmuh zat hi a inang chiah a, Lunglei club hi an intawn hmasak ṭumah 2-0 a an chak avangin an dinhmun a ṭha hret.

Robert Laldinthara kaihhruai Sihphir Venghlunin attacking football an khel dawn a, SYS lamin defensive game khelh aia attacking game khelh an thiam zawk avangin goal khung tum thoa an khelh a rinawm.

Lalmuankima kaihhruai SYS-in awmze neiin football an khel a, player-te an inhriat chian bawk avangin an game a mawi ṭhin hle. Kum 20 hnuai lam awm khawm hian MPL club ṭhate an el phak ringawt avangin fak an phu tawh a, semifinal an khelh phei chuan a record hi a ropui lehzual ang.

Tun hi SYS dinhmun fiahna tur a ni a, semifinal an thleng pha lo a nih chuan player naupangin pressure an zo lo, tih a ni leh dawn. Vawiin tlai inkhel result hian Mizoram football kal zel dan tur thlengin nghawng a nei ang.

Aizawl FC tan record thar

Victor Lalbiakmawia kaihhruai Aziawl FC tan zanin hi hun duhawm bik a ni thei a, I Day Football final-a an lungngaihna mittui hruk hul zan a ni thei dawn. I League club hian Chawnpui laka point an hmuh hrim hrim chuan league winner an ni dawn a, Covid-19 hnua nomawi an chawi lehna hmasa bera ni ang.

Hei chauh hi a ni lo, Aizawl FC hian record thar an siam thei bawk. MPL history-ah league round-a khingpui hneh loa hmang tluan an la awm ngai lo. Victor-a hote hian tun season-ah chhak loh an la nei lo a, record thar siam thei dinhmunah an ding.

Aizawl FC hian league round-a goal khng tam ber record an siam tawh a, goal 41 khung tawhin goal khung tam ber record kawltu Mizoram Police (MPL3 - 38) record chu goal thumin an pel tawh a ni.

Quarterfinal hmasa zawk
Mizoram Police Vs Ramhlun Athletic

Chawhnu dar 1:00-ah Mizoram Police leh Ramhlun Athletic te an inkhel dawn a, team pahnih aṭangin pakhat zawk tan semifinal khelhna kawng zau taka a inhawn avangin MPL11 quarterfinal tia sawi theih a ni.

MPL11 match hmasa berah Mizoram Police hian Ramhlun Athletic hi 3-2 in an hneh a, July 9, Thawhlehnia an inkhelh hi Ramhlun tan home match a ni. Tun season-ah away goal rule a awm avangin Police-in an vanneihpui a, Ramhlun tan Police chunga awm turin goal hnih tala chak a ngai dawn.

Ramhlun hian goal khung an thiam a, goal 23 an khung tawh. Tlarhmaa awm Felix Lalruatsanga'n goal riat khung tawhin top scorer beiseina a la nei a, Serchhip tlangval tan mimal lawmman la turin semifinal khelh phak a pawimawh lehzual.

Chutihrualin vawiina en bik tur erawh Malsawmfela leh a nau Lalnunmawia te inhmachhawn tur hi a ni a, Mawitea hi MPL1-a Dinthar champion puitu hi coach leh player a ni kawp. Ramhlunin Bethlehem an hneh ṭumin Mawitea hian goal hnih khungin player pawimawh a la ni.

Sawmfela erawh goal aṭanga teh a rem lo a, team tana a ṭangkaina hi a hlu ṭhin. Police hian Ramhlun aiin goal khung an la thiam zawk a, tun ṭum inelnaah goal 33 an khung tawh.

Thil thlen theih dan

League Winner: MPL11-ah away goal rule a la awm avangin Aizawl FC tan league winner ni turin point hmuh a la ngai. I League club hi Chanmari FC nen ṭum hnih inhnehtawk mah se away goal rule-ah Lalsangzuala Hmar hote dinhmun a ṭha zawk. Chutihrualin Chanmari FC an khel hmasa dawn a, relegate tawh FC Bethlehem an hneh chauhin Aizawl FC-in pressure an nei ang.

Semifinal khel tur: Aizawl FC leh Chanmari FC ten semifinal an khel dawn tih a chiang tawh. Police hian Ramhlun Athletic goal khata an hneh loh pawhin semifinal an lut thei. Ramhlun tan erawh semifinal lut chiang tur chuan goal hnih china Police an hneh a ngai. Hei bakah hian hnehna an chan hrim hrim a, Sihphir Venghlun leh SYS FC te an inhnehtawk bawk chuan semifinal an lut thei bawk.

Sihphir Venghlun leh SYS FC te inkhel a, chak zawkin semifinal an lut dawn. Police-in Ramhlun laka point an hmu hrim hrim a nih chuan SYS tan semifinal lut turin draw a tawk ang. Mahse, Ramhlun-in Police an hneh a nih erawh Sihphir Venghlun emaw SYS FC emaw tan hnehna chan chauhin semifinal a luh theih ang.

Police-in Ramhlun laka point an hmuh a, SYS leh Sihphir Venghlun te an inhnehtawk a nih chuan Chawnpui tan semifinal beiseina a nung thar chiah ang. Hetiang hi a thleng a nih chuan Lalrindika Hmar hoten Aizawl FC an hneh a nih chuan semifinal an lut thei dawn.

Relegate tur: FC Bethlehem an relegate dawn tih a chiang tawh. SYS, Sihphir Venghlun, Ramhlun Athletic leh Chawnpui FC ten semifinal khelh beiseina sang tak nei bawk mah se relegation playoff khel thei vek an la ni.