Champion zia neitu Arsenal

Premier League champion lai Manchester City an chesual tih hresa chungin Arsenal an inlan chhunzawm a, nuamsa taka chak tur anga an lan hnuah harsa takin an mikhual Leicester City chu 4-2 in an hneh hram.

Emirates Stadium-a inkhelah Gunners hian 2-0 in hma an hruai fal hman, mahse Foxes lamin an sut zo. Hun tawp dawnah Liandro Trossard-a vangin Wilfred Ndidi-a'n anmahni lama a tih luh bakah Kai Havertz ten point thum an hmuh theih nan goal an khung.

Inrinni zan North London-a inkhelah Jurrien Timber-a siamsak chu Gabriel Martinelli chuan laklawh nei miah loin a lo pet lut nghal a, Brazilian foraward hian chawlhlawk hma chiahin Trossard tan a siamsak ve bawk.

Mikel Arteta naute hi nuamsa takin an chak dawn niin a lang hman. Mahse, second half tirah James Justin chuan Facundo Buonanotte-a freekick oet chu lo tauhin Havertz-a'n a lo dang pial a, keeper David Raya tan dan hman a ni tawh lo.

Mikhual team an phur thar - goal khungtu Justin bawk kan hmu nawn. Wilfred Ndidi-a ball cross chu Justin hian lei a thlen hma chiahin a lo hem pawp a, goal kilah bawk lut lehin minute 63-naah si phurh an sut zo der!

Point thum hmu tura ingai Arsenal an talbuai tlat. Steve Cooper-a'n a naute goal a ven uluk tir tawh a, box hrulah an din khawm tlat avangin Gunners tan goal khung a harsa, mahse goal bulah hlauahawm taka an chet reng miau avangin Foxes an inveng seng lo.

Hun tawp dawnah, buai deuh nuaih kara Trossard-a pet chu Ndidi chuan anmahni lamah a ti lut a, a hnua Havertz goal khung chu video assistant referee hman a nih hnuah pawm a ni bawk a, chak phu zawkin point thum an hmu.

Arsenal manager Arteta chuan, "Goal hnih kan chhuah lai bawra kan khelh dan leh boruak kha chu hrehawm ve tak a ni, mahse hetiang boruak hi football ken tel a ni a, beidawng loa min thlawptute hmaa hnehna han chan leh kha chu thil nuam tak a ni," a ti.

Gunners hian EPL match ruk aṭangin point 14 an hmu a, champion lai Man City nen an point a inzat - hmahruaitu Liverpool chuan point 15 an nei thung, season hmasa ang bawkin champion tuma inum boruak a sang leh dawn hle.