Sports Minister-in Inter Village Futsal a 'kick off'

Mizoram Football Association leh BR Studio Production ṭangkawpin an buatsaih BR Studio MFA Inter Village Futsal Tournament chu September 28, Inrinni zan khan Chanmari YMA Hall-ah official draw leh kickoff neih a ni a, sports minister Lalnghinglova Hmarin a pet hawng.

Inelna hi R. Dengṭhuama Hall, Mualpuiah neih a ni dawn a, team 93 an inel dawn. Kumin Inter Village Futsal-ah hian Mizoram Premier League-a inziaklut player-te an tel thei dawn lo a; ISL leh I League bakah state league sang ber khel player te pawh inlan thei dawn lo.

October 10, Ningani aṭangin inelna hi khelh ṭan a ni dawn a, hemi hma hian kum 40 chunglam inelna Veteran Futsal a awm bawk ang. Veteran Futsal-ah team 16 an tel dawn a, team telte hi group paliah ṭhendarh niin group tin aṭangin a sang ber zelin semifinal an lut dawn. Final hi October 8, Thawhlehni zan dar 7:30-ah khelh a ni ang.