Chelsea ti Chelsea tu Cole Palmer

A club hmasain chhawr tlak loha an ngaih, inkhelh tama hmun an pek theih loh Cole Palmer ngei mai kha Chelsea tan a vul mek - Premier League huangah first half chhunga goal li khung thei hmasa ber a ni ta hial.

Stamford Bridge-ah mikhual Brighton & Hove Albion lamin Georginio Rutter hmangin goal nei hmasa mah se, mualneitu lamin Palmer-a goal li hmangin an chhanglet, a karlaka Carlos Baleba goalin awmzia a nei phak lo. Enzo Maresca naute 4-2 in an chak.

Nipui bazar lai khan Chelsea hian player an lei hnem, an neihsa ṭhenkhat chu an duh lo chung an nawr chhuak emaw tih mai tur a ni a, coach thar Maresca hnuaiah insiamrem turin hun an mamawh rei kha a rinawm.

Mahse, hun rei lote chhungin Italian manager Maresca hnathawh chu a taka hmuh theihin a awm a, tunah chuan Premier League champion rinkai zinga mi an ni phak ta daih, fiamthu thawh nan Blues hi hman mai mai chi an ni tawh lo!

English forawd Palmer hian ball kal lai thunun a thiam a, goal khung tura insiamrem leh hmun awl zawn hmuh kawngah hrilh chawp ngai loin a thiam tih a chiang, freekick leh penalty pet turin a inringtawk bawk - a tuartu chu Brighton kha an ni.

Chelsea manager Maresca chuan, "Cole hnenah khan goal li chauh a khung a, goal hnih emaw goal thum emaw pawh khung belh hial thei a la nih thu ka hrilh. Tun hmain Manchester City lamah kan inhre tawh a, chuvangin kan inhrechiang hle.

"Goal khung chakin a tuihal reng a, sang tak thlen tum mi a ni bawk. Goal khung bakah ṭhiante khung tur siamsak hi chu tun hma kum li kalta vel aṭang khan a thiam tawh, hetiang a ni chung pawha a inngaitlawm tlat te hi kan vanneihna a ni," a ti.

Premier League season ṭan ni khan Chelsea hian Manchester City chu 2-0 in an ngam lo, a hnuah erawh Bournemouth, Wolves, West Ham leh Brighton te an hneh - Crystal Palace nen an inhnehtawk bawk. October thla hian Notthingham leh Liverpool an hmachhawn dawn - Reds hi an tan fiahna tak a ni tawh ang.