City chak zawh loh zana a chung ber luahtu Liverpool

Inrinni zan Premier League inkhelah Manchester City an chak zo lo a, an elpui Liverpool an chak thung - Reds-in hnehna an chan avangin table chung ber an luah nghal a, City erawh pahnihnaah an tla thla thung.

Manchester City-in khualmualah Newcastle United an lenchilh a, Josko Gvardiol hmangin goal hmahruai khung mah se, Anthony Gordon-a penalty hmangin Magpies-in an chhanglet a, 1-1 in inkhel a tawp.

Pep Guardiola naute chak zawh loh thu hre sain Liverpool an inlan a, Wolverhampton Wanderers khelmualah Ibrahima Konate hmangin goal hmahruai an khung - Wolves hian Rayan Ait-Nouri hmangin si phurh sut mah se, Mohamed Salah penalty chu Liverpool chak nan a tawk.

Reds-in league match rukah vawi nga hnehna changin, table chung ber an luah a, inchhuang thei erawh an la ni lo. An hnuaia awm City leh Arsenal aia an sanna chu point khat chauh a ni a, match khat leka inthlak danglam thei a la tam hle.

City an tawlhthlu

Ṭum dang ang thoin tun season-a champion rinkai ber chu Manchester City an ni a, Newcastle United lakah pawh chak tura beisei an ni - minute 35-naah goal hmahruai an khung nghal a, a khungtu erawh defender Josko Gvardiol a ni.

City tan Gvardiol a khel ṭha a, Jack Grealish-a siamsak a khung pawh striker ke aṭanga chhuak awma mawi a ni. Premier League champion hian season tluana chhawr theih loh tur Rodri tel loin an khel a, Mateo Kovacic leh Rico Lewis ten Rodri hmun ruak an hnawh khat hneh viau.

Mahse, City an ṭang tluan thei lo. Bruno Guimaraes-a ball pek cial zet chu Gordon-a'n um lutin, City Keeper Ederson chuan a lo titlu - referee-in penalty spot a kawk zui a, Gordon a lo pen chhuak.

Kum 23 mi forward hian inringtawk takin goal-ah a chantir a, goal dang kan hmu tawh lo. City hian Ilkay Gundogan leh Bernardo Silva hmangin khung belhna remchang nei mah se, an chhawr lo a, Magpies tana Joelinton leh Sean Longstaff te chance neih pawh sawi hmaih theih a ni bik lo.

Hei le Reds!

City chak loh hnuah Arne Slot-a Liverpool an inlan a, an hun ṭha neih an bawhpelh lo. Liverpool hian a tir aṭangin an nawr nghal a, an vanneih zan a ni dawn lo emaw tih hnuah, first half hun pek belhah Konate a inlar - French defender hian Diogo Jota cross chu Premier League-a a goal hmasa ber ni turin a tauh lut.

Konate goal khung hma hian Dominik Szoboszlai chuan hnai set sawt aṭangin a khung lo a, Salah pawhin 2-0 nihtir theihna remchang nei mah se goal ruakah a khung lo!

Goal dang lut loin chawlhlawk hman a ni a, second half ṭantirah Liverpool an chesual zui. Reds tlarhnung inringthul karah Rayan Ait-Nouri chuan si phurh sutna goal a khung a, a bik takin Konate leh keeper Alisson Becker chu dem theih an ni.

Mahse, Reds an hnufual rei lo - Nelson Semedo chuan Jota lakah penalty a chawi a, a pet turin Salah a lo pen chhuak. Egyptian forward hian harsatna nei loin goal-ah a chantir a, Liverpool hi 2-1 in an chak zui.