Kane a inhliam; Bayern = Leverkusen

Bundesliga-ah Bayern Munich leh Bayer Leverkusen te 1-1 in an inhnehtawk a, Allianz Arena-a inkhel a nih avangin Xabi Alonso hote an lawm zawk ang. Vincent Kompany hote erawh an muala an chak zawh loh bakah Harry Kane chu inhliam vanga lakchhhuah a ni.

A nung ṭha

German club ṭha pahnih inkhel a ni a, club sulhnu nei ṭha zawk Bayern-in bul an ṭan ṭha. Bavarians hian ṭan phat aṭangin an nawr a, Jamal Musiala thiamna hmuh theih mah se goal hmaah a hriam tawk lo. Raphael Guerreiro-a'n box pawn aṭangin goal zawnah a pet thei lo a, box pawn chiaha Musiala freekick hlawhchhuah chu Michael Olise-a'n goal kham chungah chiah a pet.

Leverkusen bet zawk mah se Alonso hoten corner kick an hmang ṭangkai a, Robert Andrich-a'n box pawn aṭangin mawi zetin a volley lut a, minute 31-naah 1-0 a ni. Bayern an insiam rem thuai a, kum 20 mi Aleksandar Pavlovic-a'n box pawn aṭangin ṭha zetin minute 39-naah a pet lut a, keeper Lukas Hradecky-a'n a ban pha lo.

Second half ṭan chiahah Serge Gnabry-a'n goal ban a pet per a, a per leh hi chang leh mah se crossbar pet per nan a hmang a, Bayern an vanduai. Alphonso Davies leh Joshua Kimmich te pawhin box pawn aṭangin goal khung tumin a pet a, goal zawnah a pet lo ve ve.

Alonso-a'n Leverkusen tlarhnung a rem phui ṭha a, chance hmuh tur a awm meuh lo. Chutihrualin hun tawp lama Thomas Muller-a'n chance ṭha a khung lo a, Konrad Laimer ball pet pawh goal pawnah chiah a kal. Leverkusen-in chance ṭum khat an nei a, substitute Nathan Tella-a'n a pet ṭhat tawk loh avangin keeper Manuel Neuer tan dan a har lo.

Engtin zel?

Bayern-in chak hmel hmu lo mah se Bundesliga-ah match nga aṭangin point 13 hmuin hmahruaitu an la ni tho. Kompany hote bakah hian an hnuai chiaha awm RB Leipzig-in hneh loh an la tawng lo.

Season liam ta pawh khan Bayern leh Leverkusen te hi Allianz Arena-ah an inhnehtawk a, chutihrualin tun ṭum erawh a danglam hret. Bavarians-in inkhel an thunun a, 70% zet ball an chan bakah goal shot pawh vawi 18 zet an nei thei a, Leverkusen erawhin vawi thum chiah an nei thung.

Kane a dinhmun

Bayern-in Champions League-ah Aston Villa an hmachhawn lehnghal dawn a, inhliam vanga lakchhuah Kane-a chu khel lo thei dinhmunah a ding. Kompany chuan, "Doctor ka ni lo a, ka sawi thei lo. A inhliam loh hram ka beisei a, Villa hmachhawn thei se, tih hi ka duhthusam a ni," tiin a sawi.

Bayern sporting director Max Eberl pawhin, "Harry-a'n hliam vanga khelmual a chhuahsan a nih chuan a na ngei tih chu a chiang. Hliam na lo se, ka ti hle," tiin Kane chanchin a sawi ve bawk.

England-in October thla international break-ah Greece leh Finland an hmachhawn dawn a, manager lailawk Lee Carsley pawhin Kane hi dam hman turin a duh ang. Nimin lama Kane a chanchin thar berah chuan a hliam na lo nia hriat a ni.