Odisha chak zanah Isaka langsar

Tun season-a a vawi khat nan Odisha FC an chak a, an mikhual Jamshedpur FC chu 2-1 in an hneh. Khalid Jamil-a enkawl team laka an chak zanah Odisha forward Isak Vanlalruatfela chu player of the match atan thlan a ni.

Odisha hian first half-ah Diego Mauricio leh Mourtada Fall hmangin goal an khung a, 2-0 in chawlhlawk an hmang. Jamshedpur tan Fall chuan an lamah tilutin, si phurh a sut ṭhensak a, mahse, hun tawp thlenga goal awm tawh loin Odisha an chak - league match hnih an tlawm hnua an chak vawi khatna an tawng.

Kalinga Stadium-a player langsar Isaka chuan, "Kan chak ve ta hram a, kan vannei khawp mai. Keima tawkah match ṭha ve tak ka khelah ka ngai a, chutihrual chuan player of the match nih erawh ka beisei lo - Fall emaw Diego emaw khan an dawn ka ring a, rin loh takin min thlang a ni," tiin Vanglaini a hrilh.

Odisha tan hian Isaka bakah Jerry Lalrinzuala, K. Lalṭhathanga (Puitea) leh Jerry Mawihmingthanga te chuan inkhel bul an ṭan a, Khalid-a enkawl JFC tan Mizo inlan an awm lo.

Inrinni zan inkhel dangah Bengaluru chuan 3-0 in Mohun Bagan an sawp a, Edgar Mendez, Suresh Singh leh Sunil Chhetri te chuan goal khat ṭheuh an khung - Chhetri hian ISL-ah goal 64 a khung tling ta a, Bartholomew Ogbeche (63 goals) tlansanin, ISL-a goal khung hnem ber record a siam.

Bangalore club tan Lalremtluanga Fanai chu bench aṭangin luhtir a ni a, Bagan tan Lalengmawia Ralte (Apuia) chuan minute 90 a khel tluan - Kolkata club hi league match thum an khelhah vawi khat chiah an la chak a, Bengaluru an la chak vek thung!

Zirtawpni zan khan David Lalhlansanga chuan ISL-a a goal hmasa ber a khung a, East Bengal erawh a chakpui zo chuang lo. Kolkata club hi FC Goa lakah 3-2 in an tlawm - Goan club tan Borja Herera chuan hattrick a siam a, East Bengal tana Madih Talal (penalty) leh David Lalhlansanga te goal khungin awmzia a nei phak lo.

East Bengal tan Mark Zothanpuia chuan inkhel bul ṭanin, Ayush Chhetri chu bench aṭangin a lut thung.