I League 2 khel tur Chanmari FC

Mizoram football hmasawnna hmuh tur a awm zel - Chanmari FC chuan I League khelh an tumna kawngah kawng dik an zawh zel a, nimin zing khan I League 3-ah Abbas Union FC chu 2-1 a hnehin I League 2 an inpetkai.

Kalyani Stadium-a inkhelah Chanmari tan Kc Malsawmsanga'n minute 33-naah goal hmahruai a khung a, mahse, minute nga hnu lawkah Krishna Soren chuan si phurh sutna goal a khung.

Goal dang lut loin chawlhlawk hman a ni a, minute 56-naah khel ṭha em em mai Malsawmzuala chuan chakna goal a khung zui. Abbas Union lamin a chhanletna tur an nei lo a, Chanmari an chak.

Mizo club hian I League 3-ah match sarih an khelhna chiah niin an chak fai vek - match khat khelh tur la awm mah se, Lalsangzuala Hmar hote hi an tling chiang tawh a, season tharah I League 2 an khel ang.

Chanmari hian group stage chu Aizawlah thlengin, RG Stadium-a match li an khelhah an chak vek a, playoff round khel turin an tling. Kolkata khawpui an pan zui a, playoff-ah hian group B-ah awmin, tam panga an ni.

Group pakhat aṭang hian a sang pahnihte chu I League 2 khel tura tling tur an ni a, CFC-in match thum khelh tawhah hnehna an chan vek avangin match khat la hmabak mah se, I League 2 an tling chiang.

Hetihrual hian I League 3-ah champion team zawn a ni dawn a, hei hi Chanmari FC-in an tinzawn ang. Mizo club hian October 3, Ninganiah SAT Tirur an hmachhawn ang a, an chak chuan group hmahruaitu an ni chiang ang.

I League 3 final round-a group hmahruaitu pahnihte hian final an khel leh dawn a, Indian fourth division champion nih duhin Chanmari hian group hmahruaitu nih ngei an tum dawn.