A vawi khat nan Barca an tlawm

Hansi Flick hoa league match sarih zet a zawna an chak hnuah Barcelona an tlawm ve ta a, an ngam loh chu rin loh lam daih an ni - Inrinni zan khan Osasuna chu 4-2 in an ngam lo a, league match riat an khelha an vawi khat tlawmna a ni.

Mualneitu Osasuna tan Ante Budimir chuan goal hnih khungin, Bryan Zaragoza leh Abel Bretones ten goal khat ve ve an khung a, Catalan club tana Pau Victor leh substitute Lamine Yamal te goal khungin awmzia a nei phak lo.

Barcelona an tlawm a, league-a an hmahruaina a derthawng nghal. Nizan khan Madrid derby-ah Real Madrid-in Atletico Madrid an lenchilh a, Carlo Ancelotti naute hian hnehna an chan chuan point khat chiahin Barca an thlau tawh dawn.

Catalan club hian October 1, Thawhlehni zan dar 12:30-ah Champions League match khel turin Young Boys an mikhual dawn a, European football-a club inelna sang berah hian, an match hmasa berah AS Monaco an lo ngam lo tawh bawk.

2-0 phawt!

Osasuna khelmualah Hansi Flick-a'n inringtawk takin a naute a hruai a, player pawh a siksawi nual - bench lama hahdamtir zingah Raphinha leh Yamal an tel a, player pahnih hian bul ṭan loin bench-ah hun an hmang.

Mahse, German coach-in game a thlir sual a, Osasuna lakah beisei an phak lo. Minute 18-naah Bryan Zaragoza chuan chak taka ball a tlan luhpui hnuin a cross a, goal khung châka tuihal Budimir chuan chiang zetin a tauh lut.

Osasuna an phur laklawh. Goal an khung aṭanga minute 10 hnuah Zaragoza hun a her chhuak ve leh. Pablo Ibanez-a ball pek ṭha zet chu Spanish forward hian chak taka tlan lutin a um a, goalkeeper Inaki Pena tana dan rual lohin a chhuih goal.

Team ṭha leh squad chhah zawk Barcelona an hawihai a, first half chhungin goal an khung ve hman lo. 2-0 in chawlhlawk hman a ni a, kil khata lo hlim ber chu Real leh Atletico Madrid ṭantute an ni hial ang.

A tawp kharna

Minute 53-na a ni a, Barca-in beiseina thar an nei. Pau Víctor-a shot satliah tak chu Osasuna goalkeeper Sergio Herrera chuan man nghet zo loin, anmahni lamah a tilut a, 2-1 ni chiahin, Flick-a nauten beiseina thar an nei.

Mahse, Barca hlim chhung a rei lo hle. Kum 19 mi centre back Sergi Dominguez chuan box chhunga Budimir a titlu a, penalty a chawi. Kum 33 mi Budimir-a'n inringtawk takin goal-ah a chantir zui a, 3-1 a ni.

A la tawk zo lo cheu! Hun tawp nan minute nga chiah a awm tawh tihah Bretones-a inlar hun a thleng a, an goal lina a khung. Osasuna-in an mualah 4-1 ngawtin Barca lakah hma an hruai a, fans thawm chu ring tak a ni.

Barca tan rawlthar duhawm Lamine Yamal chuan mawi zetin si phurh sut ṭhen ve leh mah se, Barcelona tan tho leh turin a harsa tawh - hun tawp thlenga goal dang lut loin, khualmualah 4-2 in Barca an tlawm.

"Kan match hnuhnung ber nena khaikhinin, player kan inthlak nual a, chuvanga khel chhia pawh kan ni mai thei. Mahse, kan mamawh miau si a ni. Match khelh tur a tam em em a, player ṭhenkhat chu an inkhel tam leh lutuk a, anni ṭhatna tura enkawl hi ka ni si. Kan chawk loh avanga dem tur in duh a nih chuan keimah hi dem tur ka ni. Chawlhlawk hman hnuah kan zia hret a, 2-1 pawh a ni hman. Mahse, penalty khan min tichhe zo tak vek a ni." - Hansi Flick, Barcelona manager