Enrique enkawl PSG an buai lo

Paris Saint Germain chuan Kylian Mbappe tel lo pawhin Ligue 1 season an hman laiah buaina an nei hran lo - Inrinni zan khan an mikhual Rennes chu 3-1 in an hneh a, table hmahruaitu an ni chhunzawm zel.

Paris khawpuia inkhelah PSG tan Bradley Barcola chuan goal hnih khungin Lee Kang-in chuan goal khat a thawh ve bawk a, mikhual tana Arnaud Kalimuendo-a penalty khungin awmzia a nei phak lo.

Mbappe awm tawh lohna PSG hian tun season Ligue 1 match vawi ruk an khelh zinga pangaah hnehna an chang, ṭum khat chu an khingpui nen an inhnehtawk - point hnih hloh ve tawh mah se tlawm an nei miah lo a ni.

PSG manager Luis Enrique chuan, "Minute 70 thleng kha chuan duhthusama ṭhain kan khel, a hnuah tlema han tlakhniam ve deuh lai nei mah ila kan khelh dan kha a lungawi thlak viau a ni.

"Goal kan khung a ni satliah lo a, goal ṭha tak tak kan khung khan min tilawm," tiin a naute khelh danah a lungawi hle. Thawhlehni zan hian Champions League khel turin Arsenal an tlawh dawn, inrintawkna sang tak nen Emirates Stadium an lut ang.