Brentford leh goal rang deuh chu!
Premier League an khelh hnuhnung pathumah Brentford hian inkhel ṭan aṭanga second 40 chhungin goal an khung vek! Hma taka goal an khung theihna thuruk chu sawi chhuah a remchang lo niin Bees coach Thomas Frank chuan a sawi.
Inrinni zan EPL inkhelah, ṭan aṭanga second 37-na lekah Bryan Mbeumo chuan goal a khung, an match hmasa lama Tottenham Hotspur an tum ṭum pawhin Mbeumo bawkin second 23-naah a lo khung tawh.
September 14, Inrinni zana champion lai Manchester City nen an inkhelh pawhin Yoane Wissa chuan second 22-na lekah a lo khung tawh bawk, tun hnaia inkhel bul an ṭan dan hian sawi zui a hlawh hle.
Brentford manager Thomas Frank chuan, "Premier League hi ka hriat a ni mai a, hetiang thil hi ram dang league-ah a thleng ve em ka hre lo. Second 40 tlin hmain a zawna match thum goal khung hi khawvel record pawh a ni mahna.
"Engtiangin nge ruahmanna kan siam min zawt a, hei erawh ka chhang thei lo thung," a ti a, hma taka goal khung tura an chet dan chu midang hriatah a sawi duh lo, an khingpui hmabak tan erawh fimkhur a ngai dawn hle.
Goal rang pathum:
14 September: Manchester City nen an inkhelh ṭumin a ni a, ball an pet ṭan chiah chu goalkeeper Mark Flekken an pe. Flekken hian man City goal bulah na takin a vawrh lut a, ball hloh hmasa zauh mah se Kristoffer Ajer chuan chang lehin ani hian Keane Lewis-Potter tan a pe, Potter ball tauh hi John Stones chuan a lo chinfel mai theih loh karah Yoane Wissa chuan a khung.
21 September: Manchester City an khelh ṭum ang bawkin Tottenham an hmachhawn pawh hian a tirah goalkeeper Mark Flekken an pe. Flekken hian na takin a vawrh lut leh a, mual sira awm Lewis-Potter bawkin chang lehin, ani hian Mbeumo tan a siamsak zui leh a ni.
28 September: West Ham lakah erawh goalkeeper ni loin defender ball an pe let a, an hnu lam erawh thawnthu a danglam tam lo. Hammers goal bul lamah an vawrh leh tho a, an cross hmasa chu an lo chinfelsak. Ajer chuan rang takin a hlauhawm laiah ball a dah lut leh nghal a, remchang a hmuh chu Mbeumo-a'n a hlah lo.