Club lian pathum an chak

Italian club lian pathum Juventus, AC Milan leh Inter Milan te chuan kar tawp Serie A match an khelh hoah hnehna an chang vek a, team pahnih hi champion tura rinkai an nih avangin elpuite chetfuh laia tisual bik nih kha an duh lo.

Genoa khelmualah Juventus striker Dusan Vlahovic chuan goal hnih khungin a team hi 3-0 in a chakpui a, match ruk aṭanga point 12 hmuin table hmahruaitu an ni rih - Torino leh Napoli ten match khata an khelh tlem avangin an hmahruaina erawh a nghet lo.

Serbian striker Vlahovic hian season bul a ṭan fuh lo a, goal khung a harsat thei hle. Mahse, tun hnaiah insiamṭhain hmatawng hlauhawm tak a ni leh tawh - Old Lady tan chanchin lawmawm a ni ang.

Vlahovic chuan, "Ka lakah miten beiseina an nei tih ka hria, chumi tih hlawhtlin theih loh chu hrehawm pawh ka ti ṭhin. Match ruk aṭanga goal khat chauh ka khung phei kha chuan sawisel pawh ka hlawh nasa, tunah erawh boruak a danglam ve leh ta," a ti.

Inkhel dangah champion lai Inter Milan tan Lautaro Martinez a inlar a, Argentina international striker hian goal hnih khungin Udinese chu 3-2 in an luhchhuah a, match khelh zat inangah Juventus aiin point khatin an hniam.

AC Milan chuan San Siro-ah inkhel hmuhnawm an chhawp chhuak, an mikhual Lecce an ngam hle - chawlhlawk hmain goal li an khung fel der tawh a, point thum hmu turin Milan tan harsatna a awm lo.