Powerlifting C'ship-ah Rebel Gym an champion

Mizoram Powerlifting Association (MPA) buatsaih 14th Mizoram Inter District Powerlifting Championship chu Septermber 27-28, 2024 chhung khan MPA Training Hall, Republic Vengthlangah neih a ni a, a pumpuiah Rebel Gym an champion.

Championship-ah lifter mipa 44 leh hmeichhia paruk an tel a; Thors Powerlifting aiawh Lalhmangaihsanga chu mipa lamah best lifter a ni. Squat, bench press leh deadlift-a Hmangaihsanga chawi rih zawng belhkhawm chu 775 kg a ni a, a chawi rih zawng hi a taksa rih zawng aṭanga teha a chawi rih ber avangin best lifter a ni.

Hmeichhe best lifter-ah Lucy Lalrinpuii chu thlan a ni a, Lunglei aṭanga tel Lucy hi chawi rit ber ni lo mah se a taksa rih zawng aṭanga teha a chawi rih ber avangin best lifter-ah an thlang.