Mizoram Super League Zaninah League Stage tawp dawn

24th April, 2015

Samsung 3:16 Plan Solution Mizoram Super League-in tawp lam a hnaih zel. Final hmaa inkhelh tur awmchhun pahnih chu zanin hian khelh zawh a ni ang a, final chiah kan hmabak tawh ang.

Vawiin tlai dar 4:00 aṭangin Hawla Indoor Stadium a lun leh dawn. MSL neih meka fans nei ṭha ber pawl Khatla TBL leh Zarkawt Serpents an inkhelh dawn vang a ni. Zanin dar 8:00-ah inkhel hmuhnawm tak ni tura beiseiah Chaltlang Ryders leh Mission Veng Vikings an inkhel bawk ang.

Final tana inbuatsaihna

Vawiin tlai dar 4:00-a inkhel tur Khatla TBL hi final lut chiang tawh an nih avangin vawiin tlaia an inkhel tur hi final inpuahchah nan an rawn hman beisei a ni. An ṭhat theih ber an lan theih rualin player inenchhina hunah an hmang thei bawk. Match kua an khelh tawhah Khatla TBL-in an khingpuite zawng zawng an hneh vek a. TBL hi final lut chiang tawh an nih vang ngawtin an inthlahdah dawn lo a, final hma match hnuhnung bera chak lo chunga final hmachhawn hi an duh dawn lo.

Serpents-in MSL-ah beisei tur nei tawh lo mah se an match hnuhnung bera chak loh hi an mualphona belhchhahtu a nih theih dawn avangin chak result nen ngeia MSL season hmasa ber hi mangṭha an duh ang. Tuikual South hneh zo hlim an nih bawk avangin Serpents hian TBL hi an hlau bik hauh lo ang le.

Mission Veng hmaah Chaltlang

Zanin dar 8:00-a inkhel tur team pahnih hi MSL khelh hmaa champion sawi ri, MSL ṭan hnua beisei phak lo an ni.

Mission Veng Vikings hian MSL ṭan tir lamah bul rawn ṭan ṭha viau mah se a laihawl aṭangin an zuih ral a, MSL ṭan tira champion sawi ri kha team paruk telna tournament-ah palina an ni mek. An mualpho lutuk tur hi inven an duh chuan zaninah an chak a ngai ang. Vikings tan Lalrina Renthlei khelh leh khelh loh hian an dinhmun a tidanglam thei viau bawk.

Chaltlang Ryders hi Mission Veng Vikings ang thoa MSL ṭan hmaa champion sawi ri team kha an ni. Mahse, an beisei angin MSL hi a awlsam lo a ni maithei, table mawngphah luahlumtu an ni. Zaninah an mualphona khuh tura an chak ngei a ngai ang. Ramhlun North tlangval Lalmuanpuia Zote hi innghah nan an rawn hmang leh ngeiin a rinawm a, ani tel lo a chak tum hi Ryders tan a harsa ang.