Champions League UEFA-in seeded siam dan thlak dawn
Season thar aṭangin Europe league sang pasarih bakah champion lai chiah Champions League group stage-ah seeded an ni tawh dawn a, chu chu UEFA dan thar siam chu a ni.
Dan tharin a nghawng tur chu groupstage-ah Europe club liante awmkhawmna chance a sang lehzual ang. Tun season ṭantirh khan Premier League aṭangin Chelsea leh Arsenal te chu seeded an ni a, amaherawhchu English club zingah champion thei an awm tawh loh avangin season tharah pakhat chiah seeded an ni.
Dan hmasaah kha chuan kum nga chhunga club result aṭangin seeded siam a ni a, hei hi Arsenal vanneihna a ni. Arsenal hi kum 2010 hnuah Champions League-ah quarterfinal an la lut lo a, 2005-06 season aṭang khan pathumna emaw palina emaw dinhmun an hauh char char bawk. Hetihlai hian Premier League champion Manchester City chu seeded an ni pha lo a, dan tharah chuan champion team chu seeded an ni tawh ang.
UEFA general secretary Gianni Infantino chuan, "Football-ah chuan champion a hlu a, chuvangin champion team hi kan ngai pawimawh tur a ni. Seeded dan kalphung thar hian inelna a ti hlu lehzual dawn a ni," tiin a sawi.
August 27, 2015-a draw neih hunah chuan Arsenal, Atletico Madrid leh Porto (League-ah pahnihna ni mek) te chuan seeded dinhmun an hauh theih tawh hmel loh. Tin, league leh Champions League-a champion kawp an awm a nih chuan league ranking-a pariatna dinhmun hauh mek Netherlands league sang ber Eredivisie champion PSV chu seeded team zingah an tel ang.
League ranking sang pasarihte chu Spain, England, Germany, Italy, Portugal, France leh Russia te an ni. Season tharah hian 2013-14 season zawha club ranking kha hman tur a ni.