Champions League Review Goal chhuah lo Juventus an tlang

Champions League semifinal thleng turin Nilaini zan khan Juventus tan As Monaco khelmual-ah goal chhuah loh a tawk a, chu chu an ti thei. Juve hian an khelmual Turin-ah 1-0 an hnehna an lo chan tawh avangin inkhel pahnih belhkawmah 1-0 in an chak.

Kum 1996 khan Juventus hi Champions League-ah an champion a, hemi hnu hian he inelnaah hian an che ropui chhunzawm vak lo. Kum 2003 hnua semifinal an luh lehna hmasa ber a ni.

Inkhel chu

Stade Louis II-ah hamrik ham a nih rualin Monaco-in goal thun an mamawh tih an lantir nghal. Minute khat pawh an khelh tlin hmain Juve defender Giorgio Chiellini chuan hand ball vangin yellow card a hmu nghal.

Manoco midfielder Geoffrey Kondogbia chuan hun ṭha a nei zui nghal, box pawn aṭangin goal thun tumin a pet a , mah se Gianluigi Buffon tan hna hautak a siam sak lem lo. Juve an awm mai mai bik lo, striker Carlos Tevez kan hmu zui nghal zat a, a ni hian Andrea Pirlo cross ball chu a tauh goal teuh hle.

Monaco-in goal thun tum mah se Juve lamin goal chhuah loh an tum em avangin Joao Moutinho leh Fabinho ten Juve tlar hnung an su nghing zo lo.

Leonardo Jardim-a'n an mamawh a hria, chu chu goal khung a ni. Midfielder Jeremy Toulalan lachhuakin a aiah Manchester United striker hlui Dimitar Berbatov a luh tir. Hun tawp nan minute 30 chauh a awm tawh, Berbatov chuan Kondogbia tan ball ṭha tak a pe a, mahse Kondogbia hian goal-ah a chantir thei bik lo. Juve tlarhnung te hamrik hnuhnung ber a rik thlengin an dingkhawng thei a ni.

Inkhel chhehvel

Massimiliano Allegri kaih­hruaina hnuaiah Juve hian season an hmang ṭha hle a, tunah hian champion nomawi pathum an beisei mek. Serie A-ah hmahruaitu an nih bakah Italian Cup final an lut tawh a, Champions League -a an beiseina an chhem nung zel bawk.

Champions League-ah tunhmai kum nga chhungin Italian club an che ṭha lo hle a, kum 2010 a Inter Milan an champion hnua Italian club semifinal lut leh hmasa ber an ni.

Eng nge an sawi?

Monaco defender Aymen Abdennour chuan, "Kan khel chhe lo, goal kan venghim ṭha a, thun turin hun ṭha kan nei bawk. Mahse, a pawi ber chu kan thun thei tlat lo kha a ni. Ka ngaihdan chuan 50:50 a ni. First leg-ah pawh khan kan vanduai vang a chak lo chauh kan ni. Zanin bik kha chuan kan khel ṭha zawk a ni," tiin a sawi.

Juventus defender Patrice Evra chuan, "Zanina kan chak na hi kan zavai tan a pawimawh em em a ni. Hun reitak chhung kan thlen tawh loh semifinal kan thlen lehna tura kan thawhrim rah kan hmu a, a lawmawm hle. Zanin khan Italian khelhdan tur dik takin nghet takin kan khel," tiin a sawi.