Magpies fans an nuar zel dawn

Newcastle United neitu Mike Ashley duh lotu fans zingah an pung zel a, Ashley-a company pakhat Sports Direct dawr kawtah fans ṭhenkhat chuan lungawi lohna lantira punkhawm an tum a ni.

Fans tam zawkin lungawi lohna an lantir chhan hi club in bank lamah sum fai in pound maktaduai 34 lai a nei tih an hriatchhuah hnuah a ni a, season hmasa khan club in pound maktaduai 18.7 hlawkna an tel tih puanchhuah a ni leh ta zel bawk nen, sum tam tak awm si a players lakluh nan hman a ni miah si lo chu an hriatthiam loh thu an tlangaupui a ni.

Newcastle United fans lungawi lo te hian Premier League match Pathianni liam ta a Tottenham nen an khelh ṭum khan lungawilohna an lo lan tir tawh bawk.

Magpies hian January transfer lai khan players pakhatmah an lalut lo a, an match hnuhnung sawmah vawi khat chiah hnehna an chang bawk. Fan-te chuan club neitu Mike Ashley chu khelmual chhunga club hmasawnna ngaihtuah lo leh hlawkna ringawt umah an puh a ni.

Fans lungawi lote hian website ashleyout.com tih an siam bawk a, an website-ah chuan , "Tunhnaiah Mike Ashley hi Newcastle enkawl tura a tlin tawk loh zia kan hmu chamchi a, football club ropui tak ṭhin sum lakluhna hmanrua ang leka hman a ni hi kan hrethiam thei lo a, he club aṭang hian Mike Ashley hi chhuak ngei se kan duh takzet a ni," a ti.