Cagliari manager thar Gianluca Festa

Seria A club Cagliari chuan an manager thar atan Inter Milan defender hlui Gianluca Festa chu an ruat. Festa hian kum 2014 aṭanga Cagliari enkawl ṭantu Zdenek Zeman a thlak ang. Zdenek hian match 21-ah vawi hnih chiah Cagliari hi a chakpui thei a, team 20 awmna Serie A-ah 19 na nihpui mekin a result chhiat vang hian a hna aṭanga banna a thehlut a ni.

Kum 67-a upa Zdenek hian nikum season ṭan dawn khan Cagliari a enkawl ṭan a, mahse December thla khan a result chhiat vangin ban a ni. West Ham manager hlui Gianfranco Zola chu a aiah ruat a ni. Match sawm chiah a enkawl hman tihin ban a ni leh a, Zdenek bawk hi an ruai nawn leh. Mahse, beisei anga result ṭha a neihpui theih loh avangin Zdenek hian banna a thehlut ta a ni.

Kum 46-a upa Festa hian tunhmain Serie A team a la enkawl ngai lo hrim hrim a, March 2013 khan Italy third division club Lumezzane chuan a hna aṭangin an ban. Player a nih laiin Inter Milan bakah Portsmouth, Roma, Cagliari leh Middlesborough-ah te a lo khel tawh bawk.

Festa hian kum 2010 khan Cagliari assistant manager hna Giorgio Melis hnuaiah a lo thawk tawh a, tunah manager puitling angin a enkawl dawn ta a ni. A match hmasa berah Pathianni khian Fiorentina an hmachhawn ang.