Ashish Nehra a la tar lo

Ashish Nehra hi kar leh mai khian kum 36 a ni tawh dawn a, a career hun chhungin inhliamin a lo tibuai ve reng bawk nen a hun tawp lam a hmang tawhah mi tam zawkin an ngai. India tana a inlan hnuhnun ber pawh World Cup 2011 semi-final daih kha a ni tawh. Mahse, IPL 8-ah Nehra-a'n a la tar loh zia field chhungah a ti lang. Nilaini zanah Nehra khelhna Chennai Super Kings leh Royal Challengers Bangalore te an inkhel a, Nehra hian run sawm chiah pein wicket li a la a, run 27-in a team hnehna a chan pui. Nehra ropuina belhchhahin a awm zel.

Nilaini inkhel dangah ruahsurin a tihbuai vangin Sunrisers Hyderabad leh Kolkata Knight Riders te inkhelah DL method hman a ngai a, Hyderabad-in run 16 in hnehna an chang.

Hyderabad tan David Warner

ACA-VDCA Stadium, Visakhapat­nam-a inkhelah Hyderabad tan Shikhar Dhawan leh David Warner te hmuhnawm khawpin an khel ṭha a, India batsman Dhawan hian ball 46-ah run 54 a vaw chhuak a, captain Warner chuan ball 55 a hmachhawnah run 91 a vawchhuak bawk. Hyderabad hian over 20-ah run 176 vawchhuakin mi pali chiah an hloh.

Kolkata lamin theihtawp chhuahin an target hi an rawn um a, Manish Pandey chuan ball 24 a hmachhawnah run 33 vawchhuakin a khel ṭha hle. Run a la vawchhuak dawn chauh emaw tih laiin ruah sur in inkhel a tibuai a, over 12-ah run 101 vawchhuakin Kolkata in mi pali an hloh a, DL method hman a nih avangin chak lo zawkah puan an ngai ta a ni.

Chawlh zai rel lo Nehra

M.Chinnaswamy Stadium, Bengaluru-ah Chennai Super Kings leh Royal Challengers Bangalore an inkhel a, players naupang chhuak thar ṭha tak tak kara hming langsar ber chu veteran Ashish Nehra a ni.

Chennai Super Kings in over 20-ah run 181 vawchhuakin mi pariat an hloh a, Suresh Raina chuan ball 32 a hmachhawnah run 62 vawchhukin dinhmun duhawm takah a team a hlangkai.

Bangalore lamin an target hi umin theihtawp an rawn chhuah. Captain Virat Kohli chuan ball 42 a hmachhawnah run 51 vawchhuakin a team a chakpui mai dawn emaw tih hnuah Ashish Nehra a lo lang a, Bangalore batsman dangte pawn an ngam loh hi Kohli-a'n a ngam bik lo. Nehra kutah out-in Bangalore hian over 20-ah run 154 an vawchhuak a, wicket pariat an hloh a, run 27 a an target um pha loin a tlawm zawkah an ṭan a ngai ta a ni.

Ashish Nehra hi IPL khelh ṭan hmain a chanchin sawi ni lo mah se, tunah chuan IPL ti hmuhnawmtu zinga mi a ni ta. Match nga a khelh tawhah run 121 chiah pein wicket 10 a la tawh a, IPL 8-ah a aia vawm ṭha an awm lo. Bangalore an hneh ṭuma run sawm lek pe chunga wicket li a lak hi match khata bowler-in a vawm ṭhat ber ṭum a ni bawk.

Zanin hian Sardar Patel Stadium, Motera-ah Rajasthan Royals leh Royal Challengers Bangalore te zanin dar 8:00 hian an inkhel ang.