Hazard hmu taitu Zidane
Real Madrid B team enkawltu Zinedine Zidane chuan Chelsea midfielder Eden Hazard chu Premier League-a Blues-in ro an rel theihna tura an player thawhhlawk ber a nih thu sawi.
Kumin February thlaa kum nga leh a chanve dang Stamford Bridge-a cham belh tura contract thar ziaktu Hazard chungchang hi sawiin Zidane chuan, "Field chhunga a awm tawh hi chuan a hmuhnawm takzet ṭhin a ni. Lionel Messi leh Cristiano Ronaldo te hi player ropui leh thiam tak an ni a, anmahni ang tho a ṭha ka tih em em chu Hazard hi a ni," tiin Belgian winger chu a dah sang hle.
Real Madrid player ropui ber pawl Zidane chuan, "A khelh dan hi ka duh chi tak a ni a, a theihna zawng zawng nena khelchhuak ṭhin a nihna leh kumtin maia a hmasawnna hmuh tur awm hian Hazard hi min duh tir lehzual a ni. Tun ai pawh hian a la ṭha thei tih ka chiang a, Chelsea Premier League table chung bera an awm chhan pawh hi amah vang a ni," tiin tun season-a goal 18 khung tawhtu Hazard chu a fak hle.