I League Second Division Aizawl FC leh Chanmari FC te an fal zel thei ang em?
Season thara I League khel tur zawnnaah Aizawl FC an sang ber a, team pakhat tan chauh hmun a awm avangin an hnuaia awm Chanmari FC-in lehpelh an tum a, Lonestar Kashmir FC leh Mohammedan Sporting-in MPL3 champion hi an um zel bawk.
Vawiin tlai dar 3:00 hian Aizawl FC-in PTC Stadium, Dergaon-ah Delhi club Hindustan FC an hmachhawn ang a, hemi hunah tho hian Golaghat Stadium-ah Chanmari FC leh table mawngphaha awm PIFA Sports an inkhel bawk ang.
Aizawl FC thawh hun
Siliguri-ah Aizawl FC a zawnin match ruk an chak a, amaherawhchu Round 7-ah K. Malsawmkima team-te'n Chanmari FC an hneh lo a; Golaghat, Assam-a an match hmasa berah United SC nen goal awm lo a an inhnehtawk bawk avangin Aizawl FC hian I League khelh an tum a nih chuan match thum chunga point thum hmuh loh vek hi a thiang lo. Hmahruaitu ni chhunzawm turin Phase 1-a an hneh tawh Hindustan FC hi an hneh ngei a ṭul a ni.
Aizawl FC hian inhliam vangin Albert Zohmingmawia leh Lalṭhakima te an chhawr thei dawn lo a, player dang erawh an dam kim. Coach Mala chuan, "Squad chhah ṭha tak kan nei a, thlan harsa khawpa player intluk tlang kan kawl hi thu lawmawm zawk a ni," tiin player pahnih vanga an buai loh thu a sawi.
Aizawl FC boss hian tlar hnung lam thlak danglam an tum loh thu a sawi a, Nigerian defender Emma Chigozie bench-ah a ṭhu chhunzawm dawn tihna a ni. Midfield leh forward-ah erawh player an thlak danglam a rinawm a, foreigner pahnih chhawr theih ni mah se Nigerian forward Justice Morgan awl tirin Alfred Kemah Jaryan a mal tlat a rinawm.
An result chungchang sawi chhunzawmin Mala chuan, "Kan inelna khelh hi a sang a, chak pur pur kan duh a, a chak reng theih loh. Theihtawp kan chhuah zel dawn a, Mizo mipuite kan tan lo ṭawngṭai zel se kan duh a ni. Kan inkhelh hmasak zawk khan Hindustan hi kan hneh hram a, Golaghat-ah ruah a sur nasat bawk avangin chak chiang sa a tih ngam loh," tiin an hmabak a awlsam loh thu a sawi.
Chanmari an sang tial tial
MPL2 champion Chanmari FC-in Siliguri-a match thum an chak zawn hnuah Lonestar Kashmir an hneh lo a, Mohammedan SC leh PIFA an draw zui avangin an dinhmun a derthawng hman hle. Amaherawhchu H. Vanlalthlanga enkawl Chanmari FC hian Aizawl FC leh Kenkre FC te hneh lehin, table-ah pahnihnaah an inhlangkai leh tawh a. Hmahruaitu Aizawl FC an la hmachhawn dawn bawk avangin I League khelh hi an kutah a la awm tih an chiang hle.
PIFA hi Chanmari FC mualphona a ni a, table mawngphah club hian an inkhelh hmasak zawk ṭum khan MPL club lakah goal thum an khung a, point khat an hlawhchhuah bawk. Khami ṭum khan Chanmari FC-in defender pawimawh Lalruatthara leh Patrick Arol Enondji te inhliam vangin an chhawr thei lo a, hrem vangin Lalrinchhana a khel thei lo bawk. Tun ṭumah hian Cameroon player Patrick hi a la khel thei dawn chuang lo a, midfielder V. Lalṭanpuia a inlan thei lo bawk ang.
Chanmari FC assistant coach C. Vanlalchama chuan, "Kan inkhelh hmasak zawk khan chak chiang saah kan inngai a, kan tisual. Tunah chuan a tir aṭangin a ṭha thei ang berin kan lut ang a, point thum hlawhchhuah ngei kan duh. Kenkre lakah point thum hlu tak kan hlawhchhuak a, kha khan team chhungah phurna nasa tak min pe a ni," tiin chak zel an tum thu a sawi.
Machama chuan sawi chhunzawmin, "Min ṭantute ṭawngṭapuina vanga chak kan ni a, min ṭawngṭaipuitute chungah leh Pathian chungah lawmthu kan sawi a. I League khelh ngei tumin kan bei zel ang," tiin a sawi.
