FIFA leh UEFA-in Greek Football Federation an vau

Khawvel pum huapa football thuneitu sang ber FIFA leh Europe khawmualpuia thuneitu sang ber UEFA chuan Greek Football Federation chu Greek Football-a sorkar thuneitute an inrawlh nasat lutuk chuan hremna an tawrh tur thu an sawi.

Tunhnaiah Greek Foot­ball-ah buaina a thlen nasat avangin Greece sorkar chuan buaina thlen loh nan dan thar siam an duh a, Greek Super League chu vawi thum lai buaina chhuah ṭhin vangin an lo tih tawpsak tawh bawk.

Greece sorkarin dan thar siam an tumah hian football khelhnaa buaina a chhuah leh chuan Greece sorkarin buaina siamtute lakah £7,000 aṭanga pound maktaduai 17 thlenga chawi tir theihna an duang a ni.

UEFA leh FIFA chuan sorkar inrawlh hi an duh lo hle a, Greece sorkar hnenah an duh loh thu leh an kaltlang pui a nih chuan Greek Football Federation chu inelna hrang hrang aṭanga an chawlh tir tur thu an thawn tawh nghe nghe.

Greece sorkar erawh an dinna ngaiah an ding a, Greece deputy sports minister Stavros Kontonis chuan, "Kan dan thar duan tum hi thlak tumna kan nei lo. Greek football-a UEFA leh FIFA hmalakna zawng zawng hi awmze nei lo mai a ni," a ti.