Champions League Thlirletna Real Madrid tan Javier Hernandez-a goal a tawk

Nilaini zan khan Santiago Ber­nabeu-ah Javier Hernandez-a'n hun tawp hma minute hnih chauh a awm tawh tihah goal a khung a, Real Madrid-in kum nga chhung a zawnin Champions League semifinal an lut.

Vicente Calderon-ah Atletico Madrid leh Real Madrid goal awm loin an inhneh tawk a, inkhel pahnih belhkhawnah Real hi 1-0 a chakin semifinal hi an lut ta ni.

Hernandez hi Real Madrid leh Manchester United tana goal khung kawp thei player pangana chiah a ni a, Mexican forward hma hian Michael Owen, David Beckham, Ruud van Nistelrooy leh Cristiano Ronaldo ten club pahnih tan an lo thun tawh a ni.

Atletico Madrid midfielder Arda Turan chu yellow card vawi hnih hmuh vangin hnawhchhuah a ni a, hun tawp lam minute 15 chhung Atletico-in player 10-in an khel.

Real Madrid goalkeeper Iker Casillas chuan Champions League match 148 a khel tling ta chiah a, Xavi record a nih rual chiah, anni pahnih aia Champions League match khel tam an awm lo.

Inkhel chu

Hamrik hmasa a ri a, Real mid­fielder Toni Kroos chuan Atletico keeper Jan Oblak a enchhin nghal. Box pawn aṭangin a pet a, mahse goal chung sirah a liam puat ringawt. Cristiano Ronaldo leh Javier Hernandez te inkawp an hlauhawm chhunzawm nghal a, minute 10-naah Ronaldo freekick pet chu Hernandez chuan a thun teuh hle a, mah se goal sirah chiah chiah a kal thung.

Darkar chanve an inkhel a, Her­nandez a lansarh zanah Ronaldo a rawn inlar zauh. Atletico lamah ball luh puiin ṭha takin goal zawnah a pet a, mah se Oblak-a'n a lo dan sak. First half tawp hma hretin James Rodriguez chuan Ronaldo tan through ball ṭha tak pe mah se Portuguese forward hian Oblak a paltlang thei lo.

Second half an ṭan leh a, Real tlar hma bawk an langsar zui leh. Ronaldo ball tauh phei chu Hernandez-a'n a thun nghal teuh hle. Atletico-in an goal ven kar lakah Real an nawr let ve zauh zauh a, Tiago-a'n tauh goal theihna hun ṭha a neih a chhawr ṭangkai thei bik lo.

Minute 75-na thlengin goal a la lut lo, Arda Turan chuan ṭul lo taka Sergio Ramos laka a foul avangin yellow card vawi hnih na a hmu a, hnawhchhuah zui a ni. Player 11 an nih lai pawh a bet zawk Atletico tan beisei a tlem sawt.

Real attacking trio Rodriguez, Ronaldo leh Hernandez ten Atletico tlarhnung ṭhiat ṭhin mah se a hmawr an bawk dik thei lo. Goal thun tuma vawi 22 zet an pet tawh chu a thlawn vek a, extra time khelh ngei a ngai dawn niin a lang.

Hun tawp nan minute hnih chiah a awm tawh tihin Ronaldo thawhrah sengin Hernandez chuan he inkhela goal awmchhun leh Real chakna ni bawk chu a thun a, goal dang luhna hun awm tawh loin hun a tawp zui nghal a ni.

Eng nge an sawi?

Real Madrid boss Carlo Ancelotti chuan, "Hernandez khan a khel ṭha tak zet a ni. Training-naah a thawk rim a, beidawng duh loin theihtawp a chhuah ṭhin. A thawhrim leh tumruh rah chu zaninah khan kan hmu a ni," tiin goal awmchhun khungtu a fak hle.

Kum 26 a upa Hernandez chuan, "Ka goal thun hi ka teammate te, ka chhungte leh keimaha rinna nghat ngamtu zawng zawngte tan ka hlan e. Goal pawimawh tak tak ka lo thun ve nual tawh a, mah se zanin ami hi chu a hlu bik hle a ni," tiin a sawi.

Atletico Madrid manager Diego Simeone chuan, "Ka naute khelh danah ka lawm a, ka chhuang tak zet zet. Kan vanduai mai chauh zawk a ni. Dik tak chuan zaninah hian ka lawm lo a, kan lungngai a ni. Mahse, hei hi football-in a ken tel a ni tih kan hriat a ṭul. Player ten an theihna zawng zawng sengin an bei a, chu chu fan-te pawn an hriat ka duh a, an hriat sak ngei pawh ka beisei. Real Madrid khan player ṭha tak tak an nei a ,chak kha an phu a ni," tiin a sawi.

Real Madrid bakah hian Juventus, Bayern Munich leh Barcelona ten semi-final an lut a, Zirtawpni hian semi-final a intum tur an pawt leh ang.