Dr TAo Football-ah Mizoramin Tripura an hneh hram

Nimin tlai khan champion lai Mizoramin Dr TAo Football-a an match hnihnaah Tripura chu 5-3 in an hneh. Zan lamah Manipur leh Meghalaya an inkhel a, result kan hre hman lo. Mizoram hian Inrinni khian group stage kharna inkhelah Manipur an hmachhawn ang.

DSA Ground, Silchar-a in­khelah Mizoram tan MS Dawng­liana leh R. Laldanmawia te'n goal hnih an khung bakah Lal­fak­zuala'n goal khat a khung bawk.

Mizoramin an match hmasa bera Meghalaya an draw ṭuma an formation 4-5-1 bawk an hmang a, player lutte erawh an ti danglam thung.

Keeper-ah Dinthar FC keeper F. Lalmuanawma a awm a, defence-ah MS Dawngzela leh TC Vanlalhruaia te bawk an inkawp a, a sirah Lallawmzuala leh Lalropuia an lut. Midfield laiah Lalnunmawia kawppui turin Lalramtharmawia leh Samuel Lalhruaitluanga te'n starting eleven an chang a; wing-ah Lalfakzuala leh R. Laldanmawia te bawk awmin, tlar hmaah MPL1 top scorer MS Dawngliana a mal tlat.

Mizoramin Tripura an ngam nghal a, chance ṭha tak tak an neih hnuah minute 15-naah Danmawia cross chu Dawngtea'n a tauh lut a, minute nga hnuah Lawmtea cross chu Fakzuala'n a tauh lut leh bawk.

First half tawp hma hretin vei lam aṭang bawka Lawmtea cross chu Dawngtea'n ti goal lehin, halftime-ah 3-0 a ni.

Tripura-in second half an ṭan ṭha zawk a, hun rei lo te chhungin goal hnih an khung nghal a, tlar hnung chet fuh tawk loh vang a ni. Minute 55-naah Mizoram-in Danmawia hmangin goal lina an khung a, hemi hnu lawk hian Tripura-in an khung leh nghal a, 4-3 a ni. Minute 15 a la awm tihin Danmawia'n Tripura lamah goal hnihna a khung a, MPL1 best player hian Mizoram hmun him zawkah a dah a, 5-3 in an chak.

Mizoram coach HC Zarzo­liana chuan, "Meghalaya kan khelh ṭumin yellow card hmu kan nei a, player kan insiksawi hnem deuh avangin tlar hnung lamah kan talbuai phahin ka hria. Insiamṭhat kan mamawh a, semifinal luh chu kan inbeisei khawp mai," tiin Vanglaini palai a hrilh.